Sunday, February 26, 2012

'ARRI ALEXA' ஒரு பார்வை - அனுபவத்தின் அடிப்படையில்_Part-2

இக்கட்டுரை,  'ARRI ALEXA' ஒரு பார்வை - அனுபவத்தின் அடிப்படையில் - என்ற கட்டுரையின் தொடர்ச்சி. அதைப் படித்துவிட்டு தொடரவும்.

ஒரு டிஜிட்டல் கேமராவின் முக்கிய பாகங்களாக அதன்..

அ. லென்ஸ் மௌண்டு (Lens Mount)
ஆ. இமேஜ் சென்சார் (Image Sensor)
இ. ரெக்கார்டிங் (Recording)
ஈ. வியு பைண்டர் (View Finder)

போன்றவைகள் கருதப்படுகின்றன என்பதையும், அதில் ‘லென்ஸ் மௌண்டு’ பற்றி முந்தைய கட்டுரையில் பார்த்துவிட்டோம் என்பதை நீங்கள் படித்துவிட்டுத்தான் இங்கே வந்திருப்பீர்கள் என்ற நம்பிக்கையில் இக்கட்டுரையைத் தொடர்கிறேன்.. 

ஆ. இமேஜ் சென்சார் (Image Sensor):

டிஜிட்டல் கேமராக்களின் மிக ஆதாரமான பாகம், அதன் சென்சார் தான். சென்சாரின் தரத்தைப் பொருத்தே டிஜிட்டல் கேமராக்களின் தரம் மதிப்பிடப்படுகிறது. 'Single CCD', '3 CCD' கேமராக்களைப்பற்றி நீங்கள் கேள்விப்பட்டிருப்பீர்கள். ஒரு ‘CCD’ மூலம் ஒளியை உள்வாங்கி பதிவுசெய்வது என்பது 'Single CCD' கேமரா எனவும், மூன்று ஆதார வண்ணங்களுக்கு ஏற்ப, மூன்று தனித்தனியான 'CCD'-க்கள் மூலமாக ஒளியை பிரித்து உள்வாங்கி, பதிவு செய்வது '3CCD' கேமரா என, வகைப்படுத்தப்பட்டுள்ளதை நீங்கள் அறிவீர்கள். பெரும்பாலான ‘தொழில்முறை’ (professional) கேமராக்கள் '3CCD' வகையைச் சார்ந்தவைகள்தான்.


'CCD' என்பது ஒரு வகையான சென்சார் என்றால், ‘CMOS’ என்பது மற்றொரு வகை சென்சார். இவற்றுக்கிடையே இருக்கும் வித்தியாசத்தையும் தொழில்நுட்ப செயல்பாடுகளையும் அறிந்துகொள்ள, தனியாக ஒரு கட்டுரையே எழுதலாம். விரைவில் அதைப்பற்றி எழுதுகிறேன். இங்கே நீங்கள் தெரிந்துக்கொள்ள வேண்டியது, ‘CMOS’ என்று ஒரு சென்சாரும் பயன்பாட்டில் இருக்கிறது என்பதும், அந்த ‘CMOS’ சென்சார்தான் ‘ALEXA’ கேமராவில் பொருத்தப்பட்டிருக்கிறது என்பதையும்தான்.

‘ALEXA’ கேமராவில் ‘35mm format ALEV III CMOS’ சென்சார் பொருத்தப்பட்டுள்ளது. முழு சென்சாரின் அளவு (Sensor Size) 3392 x 2200 Pixels என்றாலும், '16:9'Aspect Ratio-வில் நமக்கு பயன்படுவது (Image Out) 2880 x 1620 Pixels தான்.

(The ALEV III sensor has a horizontal pixel count of 3.5K resulting in true 2K
resolution. It covers the full Super-35 format and it provides a latitude of 14 stops and a base sensitivity of 800 ASA)

இந்த சென்சார் 800 ASA திறன் கொண்டது. ‘14-stops latitude’ கொண்டது. இந்த ‘latitude’ மிக முக்கியமானது. ஃபிலிமைப் போல அதிக ‘latitude’ திறன் என்பது ஒரு டிஜிட்டல் கேமராவின் மதிப்பைக் கூட்டும். பொதுவாக டிஜிட்டல் கேமராக்கள் ‘latitude’ திறனில் தான் அடிவாங்கும். ஃபிலிமுக்கும் டிஜிட்டலுக்கும் இருக்கும் வித்தியாசங்களில், இந்த ‘latitude’-தான் மிக முக்கியமானது. சில டிஜிட்டல் கேமராக்கள் ‘3-stops’ அல்லது ‘5-stops latitude’ திறன் தான் கொண்டிருக்கும்.

800 ASA என்பதும் ‘14stops latitude’ என்பதும் ‘ALEXA’ கேமராவை திறன் வாய்ந்ததாகக் கருத செய்கிறது. 800ASA-வினால் குறைந்த வெளிச்சத்திலும் இக்கேமராவைப் பயன்படுத்த முடிகிறது. மேலும் உட்புற (Indoor) படப்பிடிப்பு மற்றும் இரவு நேரக்காட்சிகளில் குறைந்த அளவு ஒளியமைப்பே போதுமானதாக இருக்கிறது. குறைந்த அளவு ஒளியமைப்பு என்று நான் குறிப்பிடுவது ‘ஒளியின் அளவைத்தானே’ (quantity of Light) தவிர, ஒளியமைப்பின் முறையை (Way of Light - Lighting Pattern) அல்ல.



குறிப்பாக உட்புற படபிடிப்பின் போது பெரிய விளக்குகளுக்கு (4K PAR) பதிலாக, சிறிய விளக்கை (4Bank/10 Bank) பயன்படுத்த முடிகிறது. இப்படிச் சிறிய விளக்குகளை பயன்படுத்துவது செலவைக் குறைப்பதோடு மட்டுமல்லாமல் நேரத்தையும் மிச்சப்படுத்தும். ‘ஒண்டிப்புலி’ படத்தில் மிகக் குறைந்த ஒளியைப் பயன்படுத்தி சில காட்சிகள் எடுத்தேன். ஒரு காட்சியில் சிறு விளக்குகளையும் கொஞ்சம் ‘fill light’-யும் பயன்படுத்தி பதிவு செய்திருக்கிறேன்.

இரவு..

சிறுவிளக்குகள் + Photoflood Light

தீ.. மட்டுமே

‘ALEXA’ கேமராவில் ‘14stops latitude’ திறன் இருப்பதனால் வெளிப்புறப் படப்பிடிப்பும் சுலபமானதாக இருக்கிறது. ஃபிலிமைப் பயன்படுத்துவதைப் போலவே ‘ALEXA’ கேமராவையும் பயன்படுத்த முடிகிறது. பெரிய வித்தியாசம் ஏதும் இல்லை என்றுதான் நினைக்கத் தோன்றுகிறது. ஒரு காட்சியை ஃபிலிம் கேமரா மற்றும் ‘ALEXA’ கேமராவையும் அருகருகே வைத்து ஒரே நேரத்தில் படம்பிடித்து பார்த்தால், இரண்டு கேமராக்களும் பதிவுசெய்த பிம்பங்களில் வித்தியாசம் இருக்கலாம் (ஒருவேளை) என்றுதான் நினைக்கிறேன். அதுவும் ‘latitude’ சார்ந்து பெரிதாக வித்தியாசம் இருக்காது, அப்படியே இருந்தாலும் மிக மிகக் குறைவாகவே இருக்கும். அது ‘half stop’ அல்லது ‘one stop’-ஆகத்தான் இருக்கும் என நினைக்கிறேன். தனியாக ‘Camera Test’ எடுத்துதான் அதைப் பார்க்கவேண்டும்.


இங்கே நினைவில் கொள்ள வேண்டிய முக்கிய விஷயம்.. ‘ALEXA’ கேமராவை எவ்வித தயக்கமும் இல்லாமல் ஒரு ஃபிலிம் கேமராவைப் பயன்படுத்துவது போலவே, வெளிப்புறப் படப்பிடிப்புகளில்  பயன்படுத்தலாம்/பயன்படுத்த முடிகிறது என்பதைத்தான். மேலும் ‘SHADOWS’-உம்‘HIGHLIGHTS’-உம் ஃபிலிமைப் போலவே பதிவுசெய்கிறது. இதனால் பிம்பத்தின் ‘Contrast Ratio’ பாதிக்கப்படாமல் இருக்கிறது.

'35mm size' சென்சார் என்பதனால் ‘SHALLOW DEPTH OF FIELD’ ஆனது 35mm ஃபிலிமில் கிடைப்பதைப்போன்றே கிடைக்கிறது.

மொத்தத்தில் Alexa-வின் ‘இமேஜ் சென்சார்’, நமக்குப் போதுமானதாக இருக்கிறது என்பது உண்மை. ஃபிலிமுக்கு இணையான (ஏறக்குறைய) தரத்தில், பிம்பத்தை பதிவுசெய்கிறது என்பது என் அனுபவம்.



மற்றவை அடுத்தக்கட்டுரையில் தொடரும்...


Saturday, February 18, 2012

'Kodak' என்னும் சகாப்தம் அதன் முடிவை நோக்கி..


ஜனவரி 19, 2012 அன்று கொடாக் (Kodak) நிறுவனம் ஒரு அதிர்ச்சியை உலகத்தாருக்குக் கொடுத்தது. அந்நிறுவனம் 950 மில்லியன் டாலர், வங்கிப் பாதுகாப்பு கேட்டு கொடுத்த (bankruptcy protection) நோட்டிஸ் தான் அந்த அதிர்ச்சி. அது கொடாக் நிறுவனத்திற்கு மட்டுமான துயரம் இல்லை. உலகத்தின் பெருவாரியான புகைப்படக்காரர்களின் துயரமும் கூட.

1880-இல் துவங்கப்பட்ட கொடாக் நிறுவனம், நூற்றாண்டு கடந்தும் பல புகைப்படக்காரர்களின் விருப்பத்திற்குரியதாக இருந்திருக்கிறது. சொல்லப்போனால் பல புகைப்படக்காரர்களை உருவாக்கியதே அதுதான் எனலாம். புகைப்படம் எடுக்கும் பழக்கத்தை ஏற்படுத்தியதே கொடாக் தான். அது கண்டுபிடித்த படச்சுருள் தான் புகைப்படம் பிடித்தலை உலகத்தாரிடையே பரப்பியது, அதிகரித்தது.

முதல் படச்சுருள் , முதல் கேமரா, முதல் டிஜிட்டல் கேமரா என அது கண்டுபிடித்த பல 'முதல்'கள் உலகெங்கும் பிரபலம். புகைப்படம் பிடித்தலை எல்லாருக்குமானதாக மாற்றிக் காட்டியது அதன் பெரும் சாதனை .


ஒரு வகையில் எல்லாருடைய வாழ்க்கையிலும் கொடாக் சம்பந்தப்பட்டிருக்கிறது. சிறுவயதிலிருந்து நாம் எடுத்துக்கொண்ட பல புகைப்படங்களை ஒரு நிமிடம் நினைத்துப் பாருங்கள். அவை கொடாக் படச்சுருளைப் பயன்படுத்தி (பெரும்பாலும்) எடுக்கப்பட்டவைகளாகத்தான் இருக்கும். புகைப்படம் என்பதை சாமானியனுக்கும் உரியதாக மாற்றிக் காட்டியது கொடாக் தான்.

'Eastman Kodak Company' என்னும் கொடாக் நிறுவனம் 1880-இல் 'ஜார்ஜ் ஈஸ்ட்மேன்' (George Eastman) என்பவரால் நிறுவப்பட்டது. வடஅமெரிக்காவின் நியுயார்க் நகரை தலைமை இடமாக கொண்டு இயங்கும் இந்நிறுவனம் உலகம் முழுவதும் பல கிளைகளைக் கொண்டது. பல ஆயிரம் ஊழியர்களையும் பல கோடிப் பயனாளர்களையும் கொண்டது.

1885-இல் 'roll of Eastman’s photo plates'-ஐ கண்டுபிடித்ததிலிருந்து பல நிலைகளை கடந்து 1889-இல் மக்கள் பயன்பாட்டிற்கான படச்சுருளை அந்நிறுவனம் தயாரிக்கத் துவங்கியது. அப்படச்சுருள் தான் திரைப்படம் என்னும் கலை உருவாக காரணமாக இருந்தது என்பதை நினைவில் கொள்ளவேண்டும்.


எடிசனும் (Thomas Edison) அவரின் 'Kinetoscope' என்னும் கருவியும், கொடாக்கின் படச்சுருளும் சேர்ந்து திரைப்படம் என்னும் கலையை/துறையை உருவாக்கியது என்பது தனிக் கதை .

'kodak' நிறுவனத்தின் முதல் கேமரா 1888-இல் அறிமுகப்படுத்தப்பட்டது. 'நீங்கள் பொத்தானை அழுத்துங்கள், மற்றவற்றை நாங்கள் பார்த்துக்கொள்கிறோம்' என்ற விளம்பர வாசகத்தோடு அறிமுகப்படுத்தப்பட்ட இக்கேமராவில் 'paper film' படச்சுருள் இணைக்கப்பட்டிருந்தது. அதைப்பயன்படுத்தி நூறு புகைப்படங்களை எடுக்கலாம். புகைப்படம் எடுத்தவுடன் கேமராவையே கொடாக் நிறுவனத்திற்கு அனுப்ப வேண்டும். அங்கே அவர்கள் கேமராவில் இருக்கும் படச்சுருளை எடுத்து டெவலப் செய்தும், மாற்று படச்சுளை கேமராவில் இணைத்தும் கொடுப்பார்கள். இக்கேமராவே 'amateur photography'-இன் துவக்கமாக இருந்தது.


1897- 'box' கொடாக் கேமரா அறிமுகப்படுத்தப்பட்டது. மடித்து வைக்க கூடிய சிறிய கேமரா அது. 1900-இல் 'Brownie' என்னும் விலை குறைந்த கேமராவை கொடாக் அறிமுகப்படுத்தியது. இக்கேமராவின் விலை ஒரு டாலருக்கும் குறைவாக இருந்ததும் பயன்படுத்த மிக எளிமையாக இருந்ததும், இக்கேமராவை பிரபலமாக்கியது, பெரும் வெற்றியும் அடைந்தது.

 'Brownie'



அங்கே துவங்கிய கொடாக்கின் வெற்றிப் பயணம், உலகின் மூலை முடுக்கு எல்லாம் போய்ச் சேர்ந்தது. உலகம் புகைப்படங்களாக எடுத்துத் தள்ளியது. கொடாக் பெரும் பணம் பார்த்தது.

1935-இல் 'Kodachrome' என்னும் வண்ணப் படச்சுருளை கொடாக் நிறுவனம் கண்டுபிடித்து புழக்கத்திற்கு கொண்டுவந்தது. வண்ணமயமான உலகத்தை சிறைபிடிக்கும் ஒரு தொழில்நுட்பத்தை கண்டு உலகம் அதிசயத்தது. கொடாக் எல்லோருடைய இதயங்களிலும் இடம் பிடித்தது. இதுவும் பெரும் வெற்றியை அடையவே, அப்படச்சுருள் 8mm, 16mm, 35mm, 120, 116, 828 என எல்லா format-லும் அறிமுகப்படுத்தப்பட்டது.  தொடர்ந்து 74 ஆண்டுகள் பயன்பாட்டில் இருந்த 'கொடாக் குரோம்' படச்சுருள் 2009-இல் தயாரிப்பு நிறுத்தப்பட்டது.


'The Afghan Girl' என்னும் ஒரு ஆப்கானிய அகதிப் பெண்ணை 'National Geographic Magazine' -க்காக 'Steve McCurry' 1985-இல் படம் எடுத்தப்போது,  'Kodachrome' பெரும் புகழ் அடைந்தது. உலகப் புகழ் பெற்ற அப்புகைப்படம் Kodachrome படச்சுருளைப் பயன்படுத்தி எடுக்கப்பட்டதுதான்.    

x-ray படச்சுருளில் துவங்கி CT, MRI ஸ்கேன் வரை கொடாக்கின் கைகள் நீண்டு இருக்கிறது. இரண்டாம் உலகப்போரின் போது சிறிய 'microfilm' மற்றும் தீப்பெட்டி அளவே உள்ள சிறிய கேமராவை கண்டுபிடித்து படைகளுக்கு உதவியது
.

1960-இல் கொடாக் பெரும் நிறுவனமாக வளர்ந்து இருந்தது. 4 பில்லியன் டாலர் (இன்றைய மதிப்பில் 50 பில்லியன்) வருமானம் ஈட்டக் கூடிய நிறுவனமாக இருந்தது. ஒரு லட்சம் ஊழியர்கள் பணிபுரிந்தார்கள். வட அமெரிக்காவின் விண்வெளி பரிசோதனைகளுக்கு இந்நிறுவனமே கேமராக்களை தயாரித்து கொடுத்தது. 'நீல் ஆம்ஸ்ட்ராங்' நிலவில் கால் வைத்த போது நிலவைப் படம் படிக்கப் பயன்பட்டது கொடாக் தயாரித்த கேமராதான்.

பூமியின் முதல் படம், விண்வெளியில் இருந்து - Lunar Orbiter program in 1966

நாம் நினைக்கக் கூடும் Samsung, Canon, Nikon, அல்லது Sony நிறுவனங்களில் ஒன்றுதான் டிஜிட்டல் கேமராவைக் கண்டுபிடித்து இருக்கும் என்று.. உண்மையில் டிஜிட்டல் கேமராவைக் கண்டுபிடித்தது கொடாக் நிறுவனம்தான்.

1975-இல் 'Steven Sasson' என்னும் கொடாக் நிறுவனத்தின் அறிவியலாளர் CCD(0.1 megapixels) தொழில்நுட்பத்தை கண்டுபிடித்தார். 1991-இல் உலகின் முதல் digital SLR camera(1.3-megapixel CCD sensor)-ஐ கொடாக் அறிமுகப்படுத்தியது.

புதிய டிஜிட்டல் புகைப்படத்துறை பிறந்தது. கொடாக் துவங்கி வைத்த அத்துறை, அதன் பிறகு ஜப்பானின் கைகளில் விழுந்தது.  Canon, Sony, Fuji போன்ற பெரும் நிறுவனங்கள், தங்கள் தயாரிப்புகளால் கொடாக்கையும் உலகத்தையும் ஆக்கிரமித்தன. இந்நிறுவனங்களின் போட்டிகளிடையே கொடாக் தன் ஆளுமையைக் கொஞ்சம் கொஞ்சமாக அத்துறையில் இழந்தது. ஒருவகையில் தான் துவக்கி வைத்த தொழில்நுட்பத்தினாலேயே கொடாக் தன் முடிவை நோக்கி நகர வேண்டியதாயிற்று எனலாம்.  

முதல் டிஜிட்டல் கேமரா 

OLED display,  Bayer color filter array (RGGB Bayer filter) என பல தொழில்நுட்பங்களை கொடாக்தான் கண்டுபிடித்தது. RGGB Bayer filter-ஐப் பயன்படுத்திதான் இன்று இருக்கும் எல்லா டிஜிட்டல் கேமரா சென்சர்களும் படம் பிடிக்கின்றன.

டிஜிட்டல் தொழில்நுட்பத்தைக் கொடாக் கண்டு பிடித்திருந்தாலும்,  70, 80, 90 -களில் அதன் கவனம் படச்சுருள் சார்ந்த துறையிலேயே இருந்தது. அதன் வியாபாரங்கள் யாவும் அதை சார்ந்தே அமைந்திருந்தது. டிஜிட்டல் துறை தன் வேர்களை ஆழமாகப் பரப்பிக்கொண்டிருந்ததை, ஏனோ கொடாக் கவனிக்க தவறியது. பிற்காலத்தில் விழிப்படைந்து சுதாரிக்க முயன்றபோது காலம் கடந்து விட்டிருந்தது. Sony, Canon போன்ற நிறுவனங்கள் வெகு தூரம் தங்கள் கரங்களைப் பரப்பிவிட்டிருந்தன.

கொடாக்கின் 'EasyShare' வகைக் கேமராக்கள் பெரும் வெற்றி பெற்றவை, ஆனால் அவை மட்டுமே போதுமானதாக இருக்கவில்லை. காலம் கடந்து பல முயற்சிகளை செய்து பார்க்கிறது. Apple, BlackBerry போன்ற நிறுவனங்களுடன் இணைந்து சில தொழில்நுட்பங்களை முயற்சித்துக் கொண்டிருக்கிறது. ஆனால் அவை கொடாக்கின் சரிவை தடுத்து நிறுத்த கூடியதாக இருக்க போவதில்லை என்றுதான் படுகிறது.


புகைப்படத்துறைதான் இப்படி என்றால், மறுபுறம் திரைத்துறையும் கொடாக்கின் கையை விட்டுப்போகத் துவங்கி விட்டது. இங்கேயும் டிஜிட்டல் தொழில்நுட்பத்தின் ஆதிக்கம் விரிவடையத் துவங்கி பல காலம் ஆகிவிட்டது. 90%  படங்கள் கொடாக் படச்சுருளை பயன்படுத்திதான் எடுக்கப்பட்டு வந்தன. டிஜிட்டலின் வளர்ச்சி கொடாக்கிற்குத்தான் கேடாக முடிந்திருக்கிறது. திரைத்துறையில் அதன் ஒரே போட்டியாளர் 'Fuji' இழக்கப்போவது பெரிதாக ஒன்றும் இல்லை.

இந்நிலையில்தான் கடந்த ஜனவரி மாதம் மஞ்சள் நோட்டிஸ் கணக்காக அறிக்கை கொடுத்து, அதிர்ச்சி கொடுத்திருக்கிறது கொடாக். இப்போதைக்கு பதினெட்டு மாதங்களுக்கு கடனாக 'சிட்டி குரூப்' பணம் கொடுத்திருப்பதால் கொடாக்கின் தலை தப்பி இருக்கிறது.

பிப்ரவரியில் கொடாக் அறிவித்திருக்கிறது, இந்த ஆண்டின் துவக்க பகுதிக்குள்ளாக தன் டிஜிட்டல் கேமரா, சிறிய வடிவ விடியோ கேமரா மற்றும் டிஜிட்டல் பிரேம் தயாரிப்புகளைத் நிறுத்தப்போவதாக. லட்சக்கணக்காக இருந்த அதன் தொழிலாளர் எண்ணிக்கை படிப்படியாக குறைக்கப்பட்டு, தற்போது சில ஆயிரங்களாக சுருங்கி இருக்கிறது. பெரும் மதிப்புகளைக் கொண்டிருந்த அதன் பங்குகள் ஒரு டாலருக்கும் குறைவாய் சரிந்து இருக்கிறது.


இவ்வுலகில் பல கண்டுபிடிப்புகள் தோன்றி இருக்கின்றன. நல்லதும் கெட்டதுமாக பல மாற்றங்களை அவை ஏற்படுத்தி இருக்கின்றன. அவை எல்லாவற்றையும் விட கொடாக்கின் சாதனைகள் ஈடு இணையற்றது. இப்பூவுலகம் இருக்கும் வரை 'Kodak'-ஐ யாரும் மறந்து விட முடியாது. உலகம் தன்னை நினைவில் கொள்ளவும் கொடாக்கின் உதவியைத்தான்  நாடவேண்டியதாக இருக்கும்..!

பல சாதனைகளைப் புரிந்த கொடாக்கின் இன்றைய நிலை.. ஒரு புகைப்படக்காரனாக என்னை மிகவும் பாதிக்கிறது. மனதோடு நெருங்கிய நண்பனின் துயர முடிவைப்போல் மனமெங்கும், சொல்லொண்ணா துயரம் பரவுகிறது. கடந்து வந்த பாதைகளில் உடனிருந்த பலவற்றை நாம் இழந்திருக்கிறோம், அவற்றில் ஒன்றாக கொடாக்கும் மாறிப்போவதை கண்டு கையாலாகாதவனாக நிற்பதைத் தவிர வேறு வழி இருப்பதாகத் தெரியவில்லை எனக்கு.

Thursday, February 9, 2012

இரத்தத்தில் உறைந்த வைரம்



வைரக் கற்களை உற்பத்தி செய்யும் உலகின் முதல் பத்து நாடுகளில் ஒன்று. தாதுப் பொருட்களை ஏற்றுமதி செய்வதன் மூலம் அதிக அந்நிய செலாவணியை ஈட்டும் நாடு. 'டைட்டானியம்', 'பாக்சைட்' மற்றும் தங்கம் ஆகியவற்றை அதிகம் உற்பத்தி செய்யும் நாடுகளில் ஒன்று. உலகின் மூன்றாவது பெரிய இயற்கைத் துறைமுகத்தைக் கொண்ட நாடும் கூட... ஆனாலும் அதன் எழுபது சதவிகித மக்கள் வறுமையில் வாழ்கிறார்கள். அந்நாடு 'சியரா லியோன்' (Sierra Leone).

மேற்கு ஆப்பிரிக்காவில் அட்லாண்டிக் பெருங்கடலின் கடற்கரையை ஒட்டியமைந்த ஒரு சிறு நாடு. மற்ற ஆப்பிரிக்க நாடுகளைப் போலவே எல்லா இயற்கை வளங்களையும் கொண்டது. சுரங்கத் தொழிலை ஆதாரமாக கொண்ட நாடு, குறிப்பாக வைரக் கற்களை அதிகமாக தோண்டி எடுக்கும் நாடு. ஐம்பத்தி நான்கு லட்சத்திலிருந்து அறுபத்தி நான்கு லட்சம் மக்கள் தொகை கொண்டதாக கணக்கிடப்பட்டுள்ளது. அறுபது சதவிதம் முகமதியர்களும், அதிக அளவு கிருத்துவ சிறுபான்மையர்களும் வாழ்கிறார்கள். பதினாறு சிறு இனக்குழுக்கள், சமவிகிதத்தில் நாட்டின் முப்பது சதவிகித மக்கள் தொகையாக வாழ்ந்தாலும், அவர்களிடையே இனப்பிரச்சனையோ, மதப்பிரச்சனையோ எழுவதில்லை. உலகின் 'மத சகிப்புத்தன்மை' கொண்ட நாடுகளில் ஒன்றாக சியரா லியோன் மதிப்பிடப்பட்டிருக்கிறது.

இயற்கை வாரி வழங்கி இருந்தாலும் அந்நாட்டின் இன்றைய நிலைக்கு காரணம்.. நாம் நன்கு அறிந்த காலனிய ஆதிக்கமும் அந்நிய நிறுவனங்களின் கொள்ளையும் தான்.  


'சியரா லியோனும்' மற்ற மூன்றாம் உலக நாடுகளைப் போலவே பல அந்நிய ஆட்சிகளுக்கு உட்பட்டு, பிரித்தானியர்களின் காலனிகளில் ஒன்றாக இருந்து 27, ஏப்ரல் 1961-இல் விடுதலை அடைந்தது. அதன் முதல் பிரதமரான 'சர் மில்டன் மார்க்கே' (Milton Margai)-வில் துவங்கி அவருக்குப் பின் வந்த ஆட்சியாளர்கள் யாரும் அந்நாட்டிற்கு நல்லாட்சியை வழங்கிவிடவில்லை. ஊழல், நிர்வாக சீர்கேடு, தேர்தலில் வன்முறை, அதிகார கயமைத்தனம் போன்றவை நாட்டைச் சீர்குலைத்தது.

1968-இல் ஆட்சிக்கு வந்த 'சைக்கா ஸ்டிவன்ஸ்' (Siaka Stevens)-இன் காலத்திலேயே அந்நாட்டின் இயற்கை வளங்கள், பெரும் அந்நிய நிறுவனங்களுக்கு தாரை வார்க்கப்பட்டன. வைரங்கள் பெரும் அளவில் கிடைக்க கூடிய வாய்ப்பே அந்நாட்டை பெரும் துயரத்தில் தள்ளியது எனலாம். வைரத் தொழிலில் பெரும் நிறுவனமான 'டிபியர்ஸ்' (DeBeers)-உடன் அரசாங்கம் செய்து கொண்ட உடன்படிக்கை, பெரும் கொள்ளையாக இருந்தது. ஆட்சியாளர்களின் தனிப்பட்ட வசதிகளை பெருக்கவே அவை உதவின. 1984-இல் 'டி பியர்ஸ்' அரசாங்கத்துடனான உடன்படிக்கையை முறித்துக் கொண்டது என்றாலும் கள்ளத்தனமாக வைரங்கள் கடத்தப்பட்டன. அரசாங்கத்திற்கு வரவேண்டிய பணம் முழுவதும் தனியாரின் வசம் குவிந்தது.

இதன் தொடர்ச்சியாக நாட்டின் கருவூலம் சிதறுண்டு போனது. அரசாங்க ஊழியர்களுக்குக்கூட ஊதியம் தரமுடியாத நிலை உண்டானது. கல்வி, வேலை வாய்ப்பு என எதுவும் மக்களுக்குக் கிடைக்கவில்லை. தலைநகரமான ஃபிரிடவுனிலேயே (Freetown) எரிவாயு தட்டுப்பாடு ஏற்பட்டது. நாடு மிக மோசமான நிலையை அடைந்ததும், அதன் மேல்மட்ட வர்க்கமும், தொழில்முறை வர்க்கமும் (professional class) வெளிநாடுகளுக்கு ஓடிப்போயின. 1991-இல் 'சியரா லியோன்' உலகின் மிக ஏழ்மையான நாடுகளில் ஒன்றாக மாறிப்போனது.

RUF

நாட்டின் இந்நிலை கண்டு எழுந்து நின்ற இளைஞர் கூட்டம் ஒன்று, 'புரட்சிகர ஐக்கிய முன்னணி' - Revolutionary United Front' (RUF) என்ற அமைப்பின் பெயரில் அரசாங்கத்திற்கு எதிராக ஆயுதம் தூக்கியது. 'ஃபோடே சங்கா' (Foday Sankoh) என்பவரால் உருவாக்கப்பட்ட இவ்வமைப்பு மக்களுக்கு பெரும் நம்பிக்கையைக் கொடுத்தது.

'அடிமையும் இல்லை, முதலாளியும் இல்லை, அதிகாரமும் செல்வமும் மக்களுக்கே' ('No More Slaves, No More Masters. Power and Wealth to the People') என்று 'RUF' முழங்கியது. இலவசக் கல்வி, சுகாதாரம் மற்றும் வைர வருமானத்தில் சரிவிகித பங்கு என்பது எல்லாருக்கும் ஏற்புடையதாக இருந்தது. மக்கள் 'RUF'-ஐ வரவேற்றார்கள், இணைந்தார்கள்.

இருண்ட அரசாங்கத்தை காய் அடிப்பதும், மக்கள் அரசை நிறுவுவதும் மக்களின் பெரும் கனவாகிப்போனது. அது கொடுத்த உத்வேகம் அத்தேசத்தை 'உள்நாட்டுப் போரில்' உற்சாகமாக ஈடுபடத் தூண்டியது.

'RUF' துவக்கி வைத்த இப்போர் பல கட்டங்களைக் கடந்து வர வேண்டியதாக இருந்தது. புரட்சிக்குழு அடைந்த வெற்றியும், பெற்ற ஆதரவும், அரசாங்க படைத்துறையின் ஒரு பிரிவை 'RUF'-வோடு இணையத் தூண்டியது, இவ்விரண்டு படைகளைச் சமாளிக்க உருவான மக்கள் படை, இவற்றை அடக்க வந்த வெளிநாட்டுப்படை, அமைதிப்படை, தனியார் படை, ஐநா படை என பல பெரும் படைகள் பங்கு கொண்ட இப்போர், அம்மக்களுக்கு பெரும் இன்னல்களைக் கொண்டுவந்தது.

மற்ற எந்த உள்நாட்டுப் போரிலும் நிகழாத ஒரு கொடுமை இங்கே நடந்தது. பொது மக்களின் கை கால்களை துண்டிப்பது. ஆம்.. ஒருபுறம் 'RUF' மக்கள் தேர்தலில் ஓட்டு போடாமல் இருக்க அவர்களின் கைகளைத் துண்டித்தது. மறுபுறம் அரசு படை 'RUF'-இல் இணையாமல் இருக்க மக்களின் கை கால்களைத் துண்டித்தது. மேலும் சிறுவர்களை போரில் ஈடுபத்தியதும், வைரம் தோண்ட மக்களை அடிமைப்படுத்தியதும் நிகழ்ந்தது. சிறு பிள்ளைகளின் கைகளும் வெட்டப்பட்டன. பத்தாயிரத்திற்கும் மேற்பட்ட சிறுவர்கள் போரில் ஈடுபடுத்தப்பட்டனர். இக்கொடுமைகளை விளக்க ஒரு புத்தகமே எழுதவேண்டும். இங்கே அதற்கு இடம் போதாது.


23 மார்சு 1991-இல் துவங்கிய 'சியரா லியோனின்' உள்நாட்டுப் போர், பதினோறு ஆண்டுகளுக்குப் பிறகு 18 ஜனவரி 2002-இல் முடிவுக்கு வந்தபோது அது எதிர்பார்த்த மாற்றத்தை ஏற்படுத்தி இருந்ததா என்றால்.. இல்லை என்றுதான் சொல்ல வேண்டும். எனில் பதினோரு ஆண்டு கால போராட்டத்தின் பயன் என்ன?

வேறன்ன.. கொல்லப்பட்ட ஐம்பதாயிரம் பேர், முழுமையாகச் சீர்குலைந்து போன உள்கட்டமைப்பு, இருபது லட்சம் பேர் பக்கத்து நாடுகளுக்கு இடம் பெயர்ந்தது, பல்லாயிரக்கணக்கானோர் கை கால்களை இழந்தது மற்றும் மீண்டு வர முடிய வறுமையும்தான்.

நாட்டில் பாதிக்கும் மேற்பட்டோர் ஒரு நாள் வருமானம் என்பது ஒரு டாலருக்கும் கீழ்தான். போதிய ஆகாரம் இன்மையால் நான்கில் ஒரு குழந்தை ஐந்து வயதுக்குள்ளாகவே இறந்து போகிறது. இன்றும் அந்நாட்டின் வளம் அந்நியர்களின் கைகளில் தான் இருக்கிறது.


இதற்குக் காரணம் என்ன என்ற கேள்விக்கு பதில்.. நாம் அறிந்ததுதான். அரசியல் அயோக்கியத்தனம், உலகப்பொருளாதாரம், ஐக்கிய நாட்டு சபை, உலகயமைதி, பன்னாட்டு சமூகம், துரோகம், பேராசை.. என நீண்டுக் கொண்டே போகும் காரணங்கள் பல.    

இப்போரில் ஈடுபட்ட 'RUF'-க்கு பணம் எங்கிருந்து வந்தது? அது அந்நாட்டின் வளங்களில் ஒன்றான வைரங்களை கள்ளச் சந்தையில் விற்றதில் வந்த பணம். அப்பணத்தைக் கொண்டு ஆயுதங்கள் வாங்கப்பட்டன.

இப்படி வைரங்களைக் கள்ளச் சந்தையில் விற்று, போருக்கான ஆயுதங்கள் வாங்கப்படுகிறது என்பது 'அங்கோலிய உள்நாட்டுப் போரின்' (Angolan Civil War) போதுதான் உலகத்தாருக்கு தெரியவந்தது.  அடிமைகளால் தோண்டி எடுக்கப்பட்ட அவ்வைரங்கள் 'இரத்த வைரங்கள்' (Blood Diamond) என அழைக்கப்படுகின்றன. உலக வைரத் தொழிலில் இவ்வைரங்கள் பெரும் பங்கு வகிக்கின்றன.


2006-இல் வெளியான 'Blood Diamond' என்னும் படம் 'சியரா லியோனின் உள்நாட்டுப் போர்' நடந்த காலகட்டத்தில் நிகழும் கதை ஒன்றின் மூலமாக, 'இரத்த வைரங்கள்' பற்றிய ஒரு விழிப்புணர்வை ஏற்படுத்தியது.


'RUF' படையிடம் தன் மகனைப் பறிகொடுத்துவிட்டு, அடிமையாக சிக்கிக் கொண்டு சுரங்கத்தில் வைரம் தோண்டும் ஒரு தகப்பன். இரத்த வைரங்களை கடத்த முயன்று மாட்டிக்கொள்ளும் கதாநாயகன். இப்போரைக் கட்டுரையாக்க வந்த செய்தியாளராக கதாநாயகி. மூவரும் ஒருவருக்கொருவர் உதவிக்கொள்ள வேண்டிய சூழ்நிலையை அடிப்படையாக கொண்டு அப்போரை விவரிக்கிறார் அதன் இயக்குனர்.


'The Empire in Africa'(2006) என்னும் ஆவணப்படம் இப்போரைக் களக்காட்சிகளோடு விவரிக்கிறது. இப்போரில் அம்மக்களுக்கு இழைக்கப்பட்ட கொடுமைகளை இப்படம் பாரபட்சம் இன்றி அலசுகிறது. இரு தரப்பு படைகளும், பன்னாட்டு சமூகமும் இம்மக்களுக்குச் செய்யத்தவறியதை, செய்த துரோகத்தை இப்படம் பதிவு செய்திருக்கிறது.