Sunday, November 29, 2015

இசையும் இசை நிமித்தமும்: இசை கேட்டல்



பொதுவாக இசை கேட்பதில் இரண்டு விசயங்கள் முக்கியத்துவம் பெறுகின்றன. ஒன்று எதைக் கேட்கிறோம் என்பது, மற்றொன்று எப்படிக் கேட்கிறோம் என்பது. 

எதைக் கேட்கிறோம் என்பது அவரவர் ரசனை சார்ந்தது, மனம் சார்ந்தது. அல்லது அவரவர் அனுபவம், வாசிப்பு, பயணம், அறிமுகப்படுத்திக்கொள்ளல், திறந்த நிலை, கடந்தவந்த வாழ்வைப் பொருத்தது. 

எப்படிக் கேட்கிறோம் என்பது முற்றிலும் தொழில்நுட்பம் சார்ந்தது. ஆமாம்.. தொழில்நுட்பம் சார்ந்ததுதான். கொஞ்சம் அதிகபிரசங்கித்தனமான ஸ்டேட்மெண்டாகத் தெரிகிறதா..? விளக்குகிறேன். 

ஒரு நல்ல இசையை முழுமையாக ருசிக்க முதன்மையானது ஒரு நல்ல ‘ஒலிபெருக்கி’ (Speakers). Hi-Fi Music Systems, Home Theatre System, Portable Music system, MP3 Docking Systems, CD/Radio Cassette Players, iPod/Non-iPod Music system என எதுவாகவும் இருக்கட்டும். அதிலிருந்து வெளிப்படும் இசையை தரத்தோடு வழங்கக்கூடியதாக அதன் Speakers இருக்க வேண்டும். Speakers என்று பொதுவாக அழைத்தாலும், அதில் Driver, Tweeter, Satellite, Subwoofer என பல உள்குத்துகள் இருக்கின்றன. முன்னதாக நமக்குத் தெரியவேண்டியதெல்லாம் நல்ல Speakers ஒன்று மிக அவசியம் என்பதுதான். எந்த இசைக் கருவியில் வேண்டுமானாலும் கேட்கலாம், எந்த Speakers-இல் வேண்டுமானாலும் கேட்கலாம் என்ற பொத்தாம் பொதுவான மனநிலை வேண்டாம்.

இடம், வசதி இருப்பவர்கள் நல்ல Hi-Fi Music Systems அல்லது Home Theatre System வாங்கி வைத்துக்கொள்ளலாம். அதில் கூட, நாம் இசை கேட்கும் அறையின் தன்மையைப்பொருத்து இசையனுபவம் மாறும். அவ்வறையின் எதிரொலிப்பு தன்மை, கொள்ளவு, அதில் அடைத்துவைக்கப்பட்டிருக்கும் பொருட்களின் அடர்த்தி ஆகியவற்றைப் பொருத்தும் இசையின் வெளிப்பாடு மாறும் என்கிறார்கள். 

அதனால் என் அனுபவத்தில் நல்ல இசையை, தரத்தோடு கேட்பதற்கு இருக்கும் மலிவான, சுலபமான வழி Headphone அல்லது Earphone -இல் கேட்பதுதான். நமக்கே நமக்கான ஒரு அந்தரங்கமான இசைச் சூழலை அவை ஏற்படுத்தி விடுகின்றன. ஏ.ஆர்.ரகுமான் இசையமைத்த ‘ரோஜா’ படத்தின் பாடல்களைத்தான் முதன் முறையாக ‘Walkman’ இல் கேட்டேன். இசை ஒருபுறமெனில், இரண்டு காதுகளிலும் ஒலித்த இசை, நமக்குள்ளே எங்கிருந்தோ ஒலித்ததைப்போன்ற அவ்வனுபவத்தை என்றைக்கும் என்னால் மறக்க முடியாது. நம் மனதிலிருந்தா.. மூளையிலிருந்தா.. இதயத்திலிருந்தா என்று பிரித்தரிய முடியா பரவசம் அது. அதுவரை ரேடியோ பெட்டியிலிருந்தும், டேப் ரெக்காடரிலிருந்தும் அல்லது திருவிழாக்களிலும், விசேஷங்களிலும் இரைந்து பாடும் ஒலிபெருக்கிகளிலிருந்துதான் இசை கேட்டிருக்கிறேன். எல்லா இசையும் வெளியே இருந்து வந்தது. இசையோடு சூழலின் ஓசையும் இரைச்சலும் இணைந்திருந்தன. முதன் முறையாக காதை அடைத்துக்கொண்டிருக்கும் சின்ன ஒலிபெருக்கியில் இருந்து வழிந்த இசை மனதிற்குள் கேட்டது. சொல்லவா வேண்டும், ரோஜா படத்தின் இசை எத்தகையது என்று..?! அதன் இசையனுபவம் என்னை இசைப்பிரியனாகவும், ரகுமான் பிரியனாகவும் மற்றியது மட்டுமல்ல என்னை ஒரு வாக்மேன் பித்தனாகவும் மாற்றிற்று.

அன்றிலிருந்து எனக்கு ஒரு ஆசை தொற்றிக்கொண்டது. ஒரு நல்ல வாக்மேனை வாங்க வேண்டுமென்பதுதான் அது. ஏதேதோ நிறுவனங்களின் வாக்மேன்களை ஆரம்பத்தில் பயன்படுத்தினாலும் ‘சோனி வாக்மேன்கள்’ தான் சிறந்தவை என்பதை பிற்காலத்தில் தெரிந்துக்கொண்டேன். (வாக்மேன் என்ற சாதனத்தை உலகிற்கு அளித்ததே சோனி நிறுவனம்தான்)

சோனி வாக்மேன்களிலிருந்து வெளிப்பட்ட இசையின் தரம் சிறப்பாக இருக்கும் என்பதுமட்டுமல்லாமல், அதில் பயன்படுத்தும் பேட்டரிகளின் ஆயுள் அதிகம் என்பதும் ஒரு காரணம். மற்ற நிறுவனத்தின் வாக்மேன்களில் ஒரு கேசட்டை கூட முழுமையாக கேட்டு முடிக்க முடியாது, பேட்டரி தீர்ந்துவிட்டது என்று சொல்லும். ஆனால் சோனி வாக்மேன்கள் அப்படியல்ல. பல மணி நேரம் பாடல்களைக் கேட்கலாம். அதனால், தொடர்ந்து என் பொருளாதார வசதிக்கேற்ப சோனி வாக்மேன்களின் வெவ்வேறு மாடல்களை வாங்கிக்கொண்டே இருந்தேன். என் கல்லூரி காலங்களில் பெரும்பாலான பணம், வாக்மேனுக்கும், கேசட் வாங்குவதற்கும் செலவிட்டிருக்கிறேன். ரகுமானின் வந்தேமாதரம் ஆல்பம் வெளி வந்த காலக்கட்டங்களில் சோனி வாக்மேனில் ‘Noise Reduction’ என்றொரு வசதியும் வந்திருந்தது. அந்த வாக்மேனில் கேட்ட வந்தேமாதரம்  இசை என்றும் மறக்க முடியாது. அதன் பிறகு பல கருவிகளில் அப்பாடல்களை கேட்டு விட்டேன், அதை ஒத்த ஒரு அனுபவத்தை பெறுவதாக மனசு ஒத்துக்கொள்ள மாட்டேன் என்கிறது.

சரி..சரி இதெல்லாம் இருக்கட்டும் ஒருபுறம். நான் சொல்லவந்தது என் அனுபவத்தில், இசையை Headphone- லோ அல்லது Earphone-லோ கேட்பது பரம சுகம் என்பதைத்தான். 

இப்படி இசையை Headphone அல்லது Earphone கேட்பதில் நாம் கவனிக்க வேண்டியது மூன்று விஷயங்களை.

1. Portable Music system: எந்த ம்யூசிக் சிஸ்டமை பயன்படுத்துகிறோம்? காரணம், அதில் சேமிக்கப்பட்டிருக்கும் டிஜிட்டல் தகவல்களை அது எப்படி வெளிப்படுத்துகிறது என்பது முக்கியமானது.

இன்றைய சூழ்நிலையில் பல வகையான Portable Music system கிடைக்கிறது என்றாலும், பெரும்பாலானோர் தங்கள் கைபேசியைத்தான் பயன்படுத்துகிறார்கள். அதில் நல்ல தரமான நிறுவனங்களின் கைபேசிகளைப் பயன்படுத்தலாம். என்னைப் பொருத்தவரை iPhone மற்றும் iPod.

மற்றவர்களுக்கு கீழே என்னுடைய பரிந்துரைகள்.

iPod
Sony Walkman
Sandisk Sansa Clip/Fuze Series
Microsoft Zune/Zune HD
Creative Zen Series
Cowon J3/C2/iAudio Series


2. Audio file format: எவ்வகையான ‘Audio file format’ -ஐப் பயன்படுத்துகிறோம்? காரணம், ஒவ்வொரு ஃபார்மேட்டும் அதற்கே உரிய தரம் கொண்டவை. 

இது, நீங்கள் எவ்வகை ம்யூசிக் சிஸ்டத்தை பயன்படுத்துகிறீர்கள் என்பதைப் பொருத்தது. ஒவ்வொரு நிறுவனமும் அதற்கென தனிப்பட்ட ஃபார்மேட்டுகளைப் பயன்படுத்துகிறார்கள். MP3 எல்லாவற்றிலும் இருக்கிறது. 128 kbps கோப்புகள் பொதுவானவை என்றாலும் 48, 56, 64, 96, 192, 256 kbps அளவுகளில் இருக்கின்றன. அதில் தரமானவற்றை பயன்படுத்துங்கள்.

‘Uncompressed audio format’ - WAV, AIFF, AU or raw header-less PCM.

‘Lossless compressed audio format’ -  ALAC, FLAC,  MPEG-4 SLS, MPEG-4 ALS, MPEG-4 DST, WMA

‘Lossy compressed audio format’ - Opus, MP3, Vorbis, Musepack, AAC, ATRAC

என பலவகையான ஃபார்மேட்டுகள் உண்டு. அக்கோப்பின் ‘size’-ஐ குறைப்பதற்காக கொண்டு வரப்பட்ட வகைப்பாடுகள் இவை. அப்படி அதன் அளவை குறைக்க முயற்சிக்கும்போது அதன் தரமும் குறைந்து விடுகிறது. அதனால்தான் ஒரு ஆடியோ சீடியில் 12-15 பாடல்களையே வைக்க முடிகிறது. ஆனால், ஒரு MP3 சீடியில் 150 பாடல்கள் வரை வைக்க முடிகிறது. ஆடியோ சீடியை விட பல மடங்கு MP3 சீடியின் தரம் குறைந்தது என்பதை நினைவில் வையுங்கள். 

என்னைப்பொருத்தவரை, iPhone அல்லது iPod என்பதனால், ஆப்பிள் நிறுவனத்தின் ‘AAC’ வகை கோப்புகளை பயன்படுத்துகிறேன். தரமான இசைக்கு இவை உத்தரவாதம்.

3. Headphone / Earphone: எந்த Headphone அல்லது Earphone -இல் பாடல் கேட்கிறீர்கள் என்பது. காரணம், வெளிப்படும் இசை தரமாக இருக்க தகுதியான ஸ்பீக்கர்ஸ் வேண்டும். நல்ல வெளிச்சம் தரக்கூடிய பல்புகளைப்போலத்தான். அதே மின்சாரம் தான் என்றாலும், தரமான பல்புகளிலிருந்து வெளிப்படும் வெளிச்சத்தின் வித்தியாசத்தை நாம் உணர்ந்திருக்கிறோம் அல்லவா..!? அதேதான். 

Headphone-ஐப் பயன்படுத்தலாமா Earphone -ஐ பயன்படுத்தலாமா என்பது உங்கள் தனிப்பட்ட விருப்பம். Headphone என்பது தலைமேல் மாட்டிக்கொள்வது. இதிலிருக்கும் சிக்கல், தொடர்ந்து அவை அழுத்திக்கொண்டிருப்பதால், நீண்ட நேரம் பாடல் கேட்கும்போது, தலை மற்றும் காது மடல்கள் வலிக்கலாம் மற்றும் வேர்த்துவிடலாம்.  

Earphone, காதில் மட்டும் பொருத்திக்கொள்வது. In-ear, On-ear Headphones என அதில் இரண்டு வகை இருக்கிறது. உங்கள் பொருளாதார வசதியைப்பொறுத்து உங்களுக்கு தேவையானதை வாங்கிக்கொள்ளுங்கள். ஆனால், தரமான நிறுவனங்களின் பொருட்களை வாங்குங்கள். இணையத்தில் தேடுங்கள் பல நிறுவனங்கள் உண்டு. ‘Audiophile’ என்றொரு வகை உண்டு. இசையை அதன் முழு தரத்தோடுதான் கேட்போம் என்கிற இசை வெறியர்களுக்கானது(!).   மிக மிகத் தரமான இசையைத் தரவல்லது அது. விலை அதிகம். முடிந்தவர்கள் அவ்வகை Headphone / Earphone -களைப் பயன்படுத்தலாம். Headphone என்றாலும் குறைந்தது நீங்கள் 5000 ரூபாயாவது செலவு செய்யவேண்டும். Sennheiser-இல் பல வகைகள் இருக்கின்றன. நீங்கள் கேட்கும் இசையின் வகைமையைப்பொருத்தும் Headphone-கள் வேறுபடுகின்றன. 

நான், Apple EarPods மற்றும் Sennheiser Headphone -ஐயும் பயன்படுத்துகிறேன். Sony நிறுவனத்தின் Headphone / Earphone -களை பலவருடங்களாகப் பயன்படுத்தி வந்தேன். பிறகு Sennheiser அதை விட தரமாக இருப்பதை கண்டு கொண்டு, அவற்றை பயன்படுத்தத் துவங்கினேன். இப்போது ஆப்பிள். Apple EarPods என்பது Earphone வகையைச் சார்ந்தது. என் அனுபவத்தில் அந்த விலைக்கு (ரூ.2090) மிக தரமான Earphone அது.  மற்றவர்களுக்கு கீழே உள்ள நிறுவனங்களை பரிந்துரைக்கிறேன்.

Sennheiser
Bose
JBL
Beats
Audio Technica
Plantronics
Sony


ஆகவே நண்பர்களே இசை கேட்போம். அதை முறையாய்க் கேட்போம். தரமாய்க் கேட்போம். இசையால் வாழ்வோம்.

Thursday, November 12, 2015

ஒளிப்பதிவுப் பயிற்சிப் பட்டறை:

கடந்த இரண்டு மூன்று ஆண்டுகளாகவே பலரும் கேட்டுக் கொண்டே இருக்கிறார்கள். தமிழ் ஸ்டியோ அருண் கூட பலமுறை கேட்டு விட்டார், ஒளிப்பதிவு குறித்தான பயிற்சிப் பட்டறை ஒன்றை நடத்துங்கள் என்று. சில காரணங்களால் அதை தள்ளிப்போட்டுக்கொண்டே வந்தோம். ஆனால், இம்மாதம் (Nov) 7 மற்றும் 8 - ஆம் தேதிகளில் அதை நடத்துவதற்கான வாய்ப்பும், நேரமும் கூடி வந்தது. நடத்தி விட்டோம்!

பலர் ஆர்வமாகக் கேட்டுக்கொண்டிருந்தபோதும் எத்தனை பேர் கலந்து கொள்வார்கள் என்ற ஒரு கேள்வி இருந்துகொண்டே இருந்தது. தீபாவளி ஒருபுறம், மழை மற்றொரு புறம் என தடைகளுக்கும் குறைவில்லை. ஆயினும் நாற்பத்தி நான்கு பேர் கலந்துகொண்டார்கள். கலந்துகொண்டவர்களில், வெவ்வேறு துறை சார்ந்தவர்களும் இருந்தது ஆச்சரியமாகவும், மகிழ்ச்சியாகவும் இருந்தது. விஷுவல் கம்யுனிகேஷன் படிப்பவர்கள், இன்ஜினியரிங் படிப்பவர்கள், கணினித் துறையில் வேலை செய்பவர்கள், உதவி ஒளிப்பதிவாளர்கள், உதவி இயக்குனர்கள் மட்டுமல்லாது ஆட்டோ ஓட்டுனர், தச்சு வேலை செய்பவர், கல்லூரி ஆசிரியர் என பலரும் ஆர்வமாக கலந்துகொண்டார்கள். அமெரிக்காவில் கணினி வேலை செய்பவரும், பெங்களூரில் இருந்தும், இலங்கையிலிருந்தும் இந்த பயிற்சிக்காகவே சென்னை வந்து கலந்துக்கொண்டவர்களும் உண்டு. முந்தைய தலைமுறை இயக்குனர் ஒருவரும் கலந்துக்கொண்டார். முன்னர் திரைப்படம் எடுக்க முயன்று, பாதியில் நின்று போய், தன் குடும்ப பாரத்தால் இத்துறையை விட்டு விலகிச் சென்றவர். இரண்டு மகள்களுக்கு திருமணம் முடித்து வைத்துவிட்டு, இப்போது திரைப்படம் எடுக்கலாமென்று யோசிப்பவர். தற்போது திரைத்துறையை அரசாளும் டிஜிட்டல் வளர்ச்சியைப் பற்றி அறிந்துக்கொள்ள ஆர்வமாக கலந்துகொண்டார். இப்பயிற்சி வகுப்பு தன் திரைப்படக் கனவை நனவாக்க எல்லா நம்பிக்கையையும் கொடுத்திருக்கிறது, மிகவும் பயனுள்ள ஒரு வகுப்பு இது என்று அவர் சொன்னபோது, இப்பயிற்சி வகுப்பை நடத்தியதற்காக நிறைவையும், மகிழ்ச்சியையும் அடைந்தோம்.

திரைப்பட ஆக்கத்தில் மிக முக்கியமான ஒரு பிரிவு ஒளிப்பதிவுத்துறை. ஒளியில் ஆரம்பித்து கருவிகள் வரை பல விஷயங்கள் கற்றுக்கொள்ள இருக்கின்றன. நுணுக்கங்கள் ஒருபுறம், படைப்பாளுமை மறுபுறம். கற்பனை ஒருபுறம், தொழில்நுட்பங்கள் மறுபுறம். அழகியல் ஒருபுறம், உணர்வுகள் மறுபுறம் என பலவற்றை உள்ளடக்கிய துறை இது. இரண்டு நாட்கள் நடக்கும் பயிற்சிப் பட்டறையில் இவற்றில் எதை சொல்லித்தருவது, எதைத் தவிர்ப்பது..?

அருணும், நானும் இப்பயிற்சிப் பட்டறை நடத்தலாம் என்று யோசித்தபோதே, ஒளிப்பதிவாளர் திரு. ஞானத்தையும் எங்களோடு இணைத்துக்கொள்ள முடிவு செய்தோம். ஞானம் அவர்கள் நீண்ட நாள் நண்பர் எனக்கு. என் உடன் பிறவா சகோதரனைப்போன்றவர். திரைப்படக்கல்லூரியில் பயின்றவர். பயிற்சிக் காலத்தில் தங்கப் பதக்கம் பெற்றவர். நீண்ட அனுபவமும் வாய்ந்தவர். தமிழ், தெலுங்கு, இந்தி, மலையாளம் என எல்லா மொழியிலும் பயிற்சி கொண்டவர். அவரையும் இப்பயிற்சிப் பட்டறையில் இணைத்துக்கொள்ள, அவரை அணுகினோம். ஆர்வமாக ஒத்துக்கொண்டார். நானும் அவரும் இணைந்து இப்பயிற்சி வகுப்பை நடத்துவது என்று முடிவானது.

இரண்டு பேரும், இருவருக்குமான பாடங்களை பிரித்துக் கொண்டோம். இரண்டு மாதங்களாக முற்தயாரிப்புப் பணி நடந்தது. எதை எப்படி சொல்லித்தருவது..? எதை விடுவது..? பாடங்களை, அங்கே பலகையில் எழுதி சொல்லித்தரலாமா? அச்சிட்டு தரலாமா? அல்லது காட்சி வடிவமாக தயாரிக்கலாமா? என பல யோசனைகள். பலவாறு யோசித்து, இறுதியில் அச்சிடுவது தவிர்த்து எல்லாவற்றையும் செய்யலாம் என்று முடிவு செய்தோம். கலந்துக்கொண்டவர்கள், அவர்களே எழுத்திக்கொள்ளத் தேவையானவற்றைக் கொடுத்து விடுவோம் என்று முடிவு செய்தோம்.

பல வருடங்களுக்கு முன்பு, தேர்வுக்கு தயாரானதைப் போன்ற ஒரு சூழல் எங்களுக்கு. படித்ததை, அனுபவத்தில் அறிந்துக்கொண்டதை ஒரு பாடத்திட்டம் போல மாற்றிக்கொள்ள வேண்டிய அவசியம் இருந்தது. எதைச் சொல்வது..?, அதை எப்படிச் சொல்வது..?, எவ்வளவு சொல்வது…? தற்போது அது பயன்படுமா..? போன்ற பல கேள்விகளை எழுப்பி, அதற்கு ஏற்றாற்போல் பாடங்களைத் தயாரித்தோம்.

காட்சி ஊடகம் என்பதனால், பல காணொளிகளை தேர்ந்தெடுத்துக் கொண்டோம். ஒவ்வொரு பாடத்தைப்பற்றியும் விளக்கங்களும், உதாரணங்களும் கொண்ட காணொளிகளை சேகரித்துக்கொண்டோம். பாடங்களை, Slide Show (PPT) -ஆகவும் தயாரித்துக் கொண்டோம்.

முதல் நாள், புகைப்படத்துறையில் ஆரம்பித்து ஒளிப்பதிவுத்துறை வரை பரவிக்கிடக்கும் தொழில்நுட்பங்களை அறிமுகப்படுத்தினோம். புகைப்படக்கருவி எப்படி இயங்குகிறது, அதன் அடிப்படைத் தத்துவம் என்ன? அது எப்படி ஒளிப்பதிவுத் துறைக்கு அடிப்படையாக இருக்கிறது என்று துவங்கி, இன்றைய நவீன டிஜிட்டல் கேமரா எப்படி இயங்குகிறது என்பது வரை சொல்லிக் கொடுத்தோம். மேலும் தமிழ் மற்றும் இந்திய திரைத்துறையில் பயன்பாட்டிலிருக்கும் கேமராக்கள் யாவை, அவற்றிற்கிடையே இருக்கும் வித்தியாசங்கள், எத்தகைய முக்கியத்துவம் வாய்ந்தது என்பதைப்பற்றியும் பேசினோம்.

பின்பு, ஒளிப்பதிவுத் தொழில்நுட்பத்திலிருக்கும் சில ஆதார விதிகளையும், பல்வேறு ஒளியமைப்பு விதிகளையும் தியரி வகுப்பாக அறிமுகப்படுத்தினோம். கலந்துக்கொண்டவர்கள் மிக ஆர்வமாக பல கேள்விகளை கேட்டது மகிழ்ச்சியைத் தந்தது. கேள்விகளும் அதற்கான பதில்களும் என்று அன்றைய நாள் மிக சுவாரசியமாகக் கழிந்தது.

இரண்டாம் நாள், Practical வகுப்பாக நடத்த முடிவு செய்திருந்தோம். அதன் படி.. RED EPIC Camera, Alura Zoom, Ultra Prime Lens  போன்றவற்றையும், சில விளக்குகள் (Lights) மற்றும் அதற்குத் தேவையான துணை உபகரணங்களையும் வரவழைத்திருந்தோம். முதல் நாளே ஒளியமைப்பு முறைகளைப்பற்றி பேசியிருந்ததனால், இப்போது அதை எப்படி நடைமுறையில் செயல்படுத்துவது என்று செய்முறை விளக்கமாக அமைத்துக்கொண்டோம். ஒளியமைப்பு செய்யும் போது கவனிக்க வேண்டியவை, ஒளியமைப்பில் இருக்கும் சிக்கல்கள் அவற்றிற்கான தீர்வு, வெவ்வேறு ஒளியமைப்பு முறைகள் என பலவற்றை பேசினோம். செய்துப்பார்த்தோம். அவற்றை கேமராவில் பதிவு செய்து கொண்டோம்.








பின்பு, அவற்றை எப்படி படத்தொகுப்புக்கு எடுத்துச் செல்வது. படத்தொகுப்பு செய்வதற்கு முன்பாக செய்ய வேண்டியவை என்ன? படத்தொகுப்பு முடிந்த பிறகு, DI -க்கு எப்படி எடுத்துச் செல்வது, அதற்கு செய்ய வேண்டியவை என்னென்ன போன்றவற்றைப்பற்றிப் பார்த்தோம். இவற்றை செயல்முறை விளக்கமாகக் காட்ட, எங்கள் ‘அழகு குட்டி செல்லம்’ திரைப்படத்தின் படத்தொகுப்பாளர் திரு. பிரவீன் வந்திருந்தார். கேமராவிலிருந்து காட்சித்துண்டுகளை எப்படி படத்தொகுப்பு மென்பொருளுக்கு ஏற்றாற்போல் மாற்றிக்கொள்வது என்பதைப்பற்றியும், படத்தொகுப்பு செய்யப்பட்ட இறுதி வடிவத்தை எப்படி DI மென்பொருளுக்கு அனுப்புவது என்பதைப்பற்றியும் செயல்முறை விளக்கம் கொடுத்தார்.

தொடர்ந்து ‘B2H’ என்ற DI நிறுவனத்தின் Colorist  திரு. ஷ்யாம் அவர்கள், எப்படி வண்ண நிர்ணயித்தலை செய்வது என்று செய்துகாட்டினார். தமிழ், மலையாளம் என பலப்படங்களில் பணி புரிந்தவர் ஷ்யாம். அண்மையில் வெளியாகி வெற்றி நடை போட்ட ‘டிமாண்டி காலனி’ திரைப்படத்தின் Colorist அவர்தான்.

இரண்டு நாட்கள். கிட்டதட்ட 20 மணி நேரம். ஒளிப்பதிவு குறித்து பலவற்றை பார்த்தோம். பேசினோம். பகிர்ந்துக்கொண்டோம்.

ஆயினும், இந்த இரண்டு நாட்கள் போதவில்லை என்பதுதான் எங்கள் எல்லோருடைய கருத்தும். கலந்துக்கொண்டவர்கள் பலரும், மீண்டும் இப்படியான ஒரு பயிற்சிப் பட்டறையை நடத்துங்கள், நாட்களை அதிகப்படுத்துங்கள். நாங்கள் கலந்துக்கொள்கிறோம் என்றார்கள்.

உண்மைதான். இப்பயிற்சிப் பட்டறையை ஒரு பாடத்திட்டம் போல இல்லாமல், ஒளிப்பதிவு துறைச்சார்ந்த பலவற்றை பகிர்ந்துகொள்ளும் ஒரு கலந்துரையாடல் நிகழ்ச்சியைப்போல அமைத்துக்கொண்டோம். பலவற்றை அறிமுகப்படுத்தினோம். தெரிந்துக்கொள்ள, கற்றுக்கொள்ள நிறைய இருக்கிறது என்பதைப் புரியவைத்தோம். ஒரு வழிகாட்டியாக இருக்க முயன்றோம். இவ்விரண்டு நாட்களில் பேசிவற்றைப்பற்றி தனித்தனி வகுப்புகளாக எடுக்கலாம். அத்தனை உள்ளடக்கம் கொண்டவை.

ஆர்வம் கொண்டவர்கள் தெரிவியுங்கள். அவற்றைப்பற்றி தனித்தனியாக ஒரு பயிற்சிப்பட்டறை நடத்தலாம் என்று கேட்டுக்கொண்டோம். பலரும் தங்கள் கருத்துக்களை எழுதி கொடுத்திருக்கிறார்கள். அவர்களின் ஆர்வத்தை பார்க்கும்போது எங்களுக்கு ஆச்சரியமும், மகிழ்ச்சியும் ஒருசேர ஏற்படுகிறது.

ஒளியமைப்பு, படைப்பாக்கம், டிஜிட்டல் தொழில்நுட்பம் பற்றி தனித்தனியாக பயிற்சி பட்டறைகள் நடத்தக் கேட்டிருக்கிறார்கள். விரைவில் அவற்றை நடத்த முயற்சிக்கிறோம். திரைத்துறை சார்ந்து ஆர்வம் கொண்ட நண்பர்கள் தவறாமல் கலந்துக் கொள்ளுங்கள்.

வெளிநாடுகளில் இப்படியான பயிற்சி வகுப்புகள் தொடர்ந்து நடத்தப்படுகின்றன. இங்கே மிக அரிது. நான் திரைத்துறைக்கு வந்த காலக்கட்டத்தில், கொடாக் (Kodak) போன்ற நிறுவனங்கள் தங்கள் படச்சுருள்களை அறிமுகப்படுத்தும் போதுதெல்லாம் பயிற்சிப் பட்டறைகளை நடத்துவார்கள். இந்தியாவில் அவர்கள் அதிகம் நடத்தியதில்லை. அதன் நிர்வாகிகளை தொடர்பு கொண்டு, இங்கே அப்படியான பயிற்சி வகுப்புகளை நடத்துங்கள் என்று பல தடவை கேட்டிருக்கிறேன். இங்கே அதற்கு வரவேற்பு இல்லை, அதனால் நடத்த வாய்ப்பு இல்லை என்பார்கள். ஆனால், இன்று அப்படி இல்லை. பலர் ஆர்வமாக கலந்துகொள்கிறார்கள். முறையாகத் தெரிந்துகொள்ள வேண்டும் என்ற ஆவல் பலரிடமிருப்பதைக் காண முடிகிறது. தொடர்ந்து இப்படியான பயிற்சிப் பட்டறைகளை நடத்த முயற்சிப்போம். கற்றதை, பெற்றதைப் பகிர்ந்து கொள்வோம்.

கலந்து கொண்ட நண்பர்களுக்கும், திரு. பிரவீன், திரு. ஷ்யாம், திரு. ஞானம், திரு.அருண் மற்றும் தமிழ் ஸ்டுடியோ மாணவர்கள் அனைவருக்கும் நன்றி. ‘காவிய லட்சுமி யூனிட்’ -இல் இருந்து கேமரா மற்றும் விளக்குகளை கொடுத்திருந்தார்கள். அதன் நிறுவனர் திரு. பாஸ்கர் அவர்களுக்கும் நன்றி.