Thursday, December 31, 2015

'அழகு குட்டி செல்லம்'


கே.என்.சிவராமன்
//
இரண்டரை மணி நேரத்தில் இவ்வளவு கதை சொல்ல முடியுமா என்று ஆச்சர்யப்பட வைக்கிறது ‘அழகு குட்டி செல்லம்‘. 
வணிக சினிமாவின் எல்லைக்கு உட்பட்டு உருவாகியுள்ள தரமான கமர்ஷியல் படம். ஒவ்வொரு ப்ரேமையும் நெகிழ வைக்கும் ஒரு பக்க கதையாக செதுக்கியிருக்கிறார் எழுதி, இயக்கியிருக்கும் Antony Charles சார்லஸ்.
மருந்துக்கும் எதிர்மறை கதாபாத்திரங்கள் இல்லை.
ஆனால், பரபரவென திரைக்கதை நகர்கிறது.
ஒளிப்பதிவும், எடிட்டிங்கும், இசையும் படத்துக்கு பெரிய பலம்.ஒளிப்பதிவாளர் விஜய் ஆம்ஸ்ட்ராங் Vijay Armstrong நிச்சயம் இந்தப் படத்துக்கு பிறகு பேசப்படுவார்.ஏ.ஆர்.ரகுமானின் உதவியாளரான, வேத் சங்கர் சுகவனம் -‘மதுபானக் கடை‘யை தொடர்ந்து இந்தப் படத்துக்கு இசையமைத்திருக்கிறார். பாடல்கள் அனைத்துமே செவியை வருடுகின்றன. பின்னணி இசையோ மனதை மயக்குகிறது.நா.முத்துகுமாரின் கிரீடத்தில் மேலும் ஓர் இறகு.பத்திரிகையாளராகவும், சின்னத்திரை இயக்குநராகவும் முத்திரை பதித்த ‘நீயா நானா‘ ஆண்டனி திருநெல்வேலி Neeya Naana Anthony Thirunelveli -இந்தப் படத்தின் வழியாக திரைப்பட தயாரிப்பாளராக உயர்ந்திருக்கிறார்.இப்படி வலிமையானவர்களும், திறமையானவர்களும் கைகோர்த்து இப்படத்தை உருவாக்கி இருப்பதாலோ என்னவோ -‘காக்கா முட்டை‘ வரிசையில் இப்படமும் இடம் பெற்றிருக்கிறது. தமிழ் சினிமாவின் பெருமையை இன்னொரு படி உயர்த்தியிருக்கிறது.படத்தில் இடம்பெற்றிருக்கும் ஒவ்வொரு கதாபாத்திரமுமே முக்கியமானதுதான். அந்தளவுக்கு டைட் screenplay.நேற்று மாலை படம் பார்த்தது முதல் மனம் பொங்கிக் கொண்டே இருக்கிறது.ஜனவரி ஒன்று அன்று ‘அழகு குட்டி செல்லம்‘ ரிலீசாகிறது.Don't Miss It.
//
- திரு. கே.என்.சிவராமன் 
-----------------------
என் திரை வாழ்வில் மிக முக்கியமானப்படம். மனசுக்கு நெருக்கமான படமும் கூட. காரணம், இப்படத்தின் கதை, இப்படத்தின் இயக்குனர் திரு. சார்லஸ், இதன் தயாரிப்பாளர் திரு.ஆண்டனி, இசையமைப்பாளர் திரு.வேத் சங்கர், படத்தொகுப்பாளர் திரு. ப்ரவீன், வசனகர்த்தா திரு. ஐய்யப்பன் என தகுதி வாய்ந்த சகக்கலைஞர்களோடு இணைந்து பணிபுரிந்தது. 
குழந்தைகளைப்பற்றியப்படம், குழந்தைகளுக்கானது மட்டுமல்ல, ஒட்டுமொத்த பெற்றோர்களுக்கானதும் கூட. குழந்தைகளை வைத்துக்கொண்டு பெரியவர்களுக்கு கதை சொல்லும் படம். பல கிளைக்கதைகளை வைத்துக்கொண்டு மிக சுவாரசியமாக பின்னப்பட்ட இதன் திரைக்கதை என்னை பிரமிக்க வைத்தது. இயக்குனர் சார்லஸ் இக்கதையை முதலில் என்னிடம் சொன்னபோது, இதன் திரைக்கதையில் இருக்கும் அடர்த்தியை கருத்தில் கொண்டு, இதை தயாரிக்க அவ்வளவு சீக்கரமாக யாரும் முன் வரமாட்டார்கள் என்று கருதினேன். காரணம் நீங்கள் அறிந்ததுதான், நமக்குதான் அத்தனை அடர்த்தியான படங்கள் தேவைப்படுவதில்லையே. 
"முதலில், இந்தக் கதைக்கு தயாரிப்பாளர் கிடைக்கட்டும் சார், அதுவே இப்படத்தின் வெற்றிக்கான அடையாளம், இந்தப்படத்தை எடுத்துட்டமுன்னா அது கண்டிப்பா வெற்றிப்படமாகத்தான் இருக்கும்" என்றுதான் இயக்குனரிடம் சொன்னேன். அக்கதையை நான் குறைத்து மதிப்பிடவில்லை. இதை புரிந்துக்கொள்ளக்கூடிய ஒரு தயாரிப்பாளர் கிடைப்பது அரிது என்ற அர்த்தத்தில் அப்படி சொன்னேன். பிறகு இதை மறந்துவிட்டு, இயக்குனர் சார்லஸும் நானும் வேறொரு கதையைத்தான் படமாக்க முயன்றுக்கொண்டிருந்தோம்.
ஆனால், ஆச்சரியத்தை பாருங்கள்..!
அதுநாள் வரை திரைப்படத்தயாரிப்பில் எவ்விதத்திலும் சம்பந்தப்படாத திரு. ஆண்டனி அவர்கள் இக்கதையை கேட்ட மாத்திரத்தில் தயாரிக்க முடிவெடுத்தார். டீக்கடையில் பேச்சுவாக்கில் இக்கதையை சார்லஸ், ஆண்டனி அவர்களிடம் சொன்னபோது, அக்கதையின் பால் ஈர்க்கப்பட்டு படமெடுக்க முடிவெடுத்தார். அன்றையிலிருந்து பதினைந்தாவது நாளில் படபிடிப்புக்கு சென்றுவிட்டோம். ஒரு படைப்பு அதற்கு தேவையானதை அதுவே தேடிக்கொண்டது. ஒரு தயாரிப்பாளரையே அது உறுவாக்கி விட்டது.  smile emoticon
இப்படம் எனக்கு பிடித்திருப்பதற்கு இன்னொரு முக்கிய காரணம், இப்படத்தில் நிறைந்திருக்கும் குழந்தைகள் மற்றும் சிறுவர்கள். பெரும்பாலும் எல்லா நாட்களிலும் படபிடிப்பு தளத்தில் குழந்தை ஒன்று இருக்கும். எப்போதும் சிறுவர்கள் இருப்பார்கள். இக்கதையில் நடித்திருக்கும் சிறுவர்கள் கென், யாழினி, சானக்கியா, நேகா, ராஜேஷ், நிலாக்குட்டி, அம்மு குட்டி என எல்லோரும் எனக்கு செல்லங்கள். அவர்கள் எப்போது என்னை அவர்களில் ஒருவனாகத்தான் நினைப்பார்கள். வேலையில் இருக்கும் பளு, அயர்ச்சி, கடுமைத்தனம் எதுவும் தெரியாது. நாள் முழுவதும் விளையாடி, மகிழ்ந்து செய்தப்படம் இது. எங்கள் படபிடிப்புத்தளமே ஒரு பள்ளிக்கூட சுற்றுலாப் போலத்தான் இருக்கும்.
மகிழ்ச்சியாக படத்தை எடுத்து முடித்துவிட்டோம், என்றாலும் எனக்கு ஒரு பயம் இருந்துக்கொண்டேதான் இருந்தது. இக்கதையின் அடர்த்தி, கதை(கள்) திரையில் வந்துவிடுமா? அதை சரியாக சொல்லிவிட்டோமா? என்றொரு அச்சம் இருந்துக்கொண்டே இருந்தது. பொதுவாக திரைப்பட உருவாக்கத்தில் ஒரு சிக்கல் இருக்கும். அதாவது, அதன் தொழில்நுட்ப கலைஞர்கள் பல தளங்களில் அப்படத்தின் நிலையை பார்ப்போம். பேப்பரில் எழுதப்பட்ட கதையாக, எடுக்கப்பட்ட பிம்பங்களாக, கோர்க்கப்பட்ட காட்சிகளாக.. அதன் தயாரிப்பு பணிகளில் பல கட்டங்களில், ஒரு திரைப்படத்தை பகுதி பகுதியாக பார்ப்போம். பல நூறு தடவை பார்க்கவேண்டியதிருக்கும். திரைப்படம் ஒரு கலைதான் என்றாலும், அது தயாரிக்கப்படும் போது, பெரும் தொழில்நுட்ப செயல்பாடுகள் கொண்டது என்பதனால்.. பெரும்பாலும் அதை தொழில்நுட்ப பார்வையோடு அணுகுவோம். அங்கேதான் அச்சிக்கல் உண்டாகிறது. பல தடவை பார்க்கப்படுவதனால், ஒரு கட்டத்தில் அதன் கலைத்தன்மை பிடிபடாமல் போய்விடும். நல்லா இருக்கா இல்லை என்ற புரிதலுக்கே வரமுடியாது. அதனால் தான் பெரும்பாலான கலைஞர்களால் தங்கள் திரைப்படம் சரியாக வரவில்லை என்பதை ஊகிக்க முடியாமல் போய், முதல் நாள், முதல் காட்சியில் பார்வையாளன் பார்த்து சொல்லும் வரை அது தெரியாமல் இருக்கிறது. 
ஒரு ஓவியன் தான் தீட்டிய ஓவியத்தை தள்ளி நின்று பார்த்து, சீரமைப்பது போல தன் படைப்பை, வெளியே இருந்து பார்த்து அதன் நிறை குறைகளை சரி செய்ய ஒரு கலைஞன் தகுதி வாய்ந்தவனாக இருக்க வேண்டும். அது மிக சில படைப்பாளிகளால் தான் முடிகிறது. குறிப்பாக இத்தகுதி இயக்குனர்களுக்கு அவசியம். அதனால் தான் படபிடிப்பை விட, அதிக கவனமும், உழைப்பும் அப்படத்தின் பிற்தயாரிப்பு(Post Production) நிலையில் தேவைப்படும் என்று சொல்லுவார்கள்.
அதனால் தான்.. எடுக்கப்பட்ட திரைப்படத்தை, அப்படத்தோடு சம்பந்தப்படாதவர் யாரேனும் பார்த்தால் அவரின் அபிப்பிராயத்தை அறிய ஆவலாக இருப்போம். என்ன சொல்லுவாரோ.. படம் பிடித்திருக்குமா? பிடித்திருக்காதா..? சொல்லப்பட்ட கதை திரையில் இருக்கா? அது அதன் தரத்தோடு வெளிப்பட்டிருக்கா? புரிந்ததா..? என பல கேள்விகள் தோன்றும். வெளியாள் யாரேனும் படத்தை பார்த்துவிட்டு சொல்லும் கருத்து எங்களுக்கு அவ்வளவு முக்கியமானது.
அவ்வகையில்.. நேற்று படத்தில் பணிபுரிந்தவர்களின் குடும்பங்களுக்கான காட்சி திரையிட்டோம். என் வீட்டிலிருந்து அம்மா, மாமா, மாமி என எல்லோரும் வந்திருந்தார்கள். இருநூறு சொச்சம் பேர் படம் பார்த்தோம். படம் பார்த்துவிட்டு வரும்போது அம்மாவிடம் படம் எப்படி என்று கேட்டேன். ‘நல்லாயிருக்கு டா.. நல்ல படம்’ என்றார்கள். அதேதான் என் மாமா, மாமியின் அபிப்பிராயமும். என்றாலும் வீட்டுக்கு வந்து அம்மாவிடம்.. அன்பாக “உண்மையை சொல்லுமா.. படம் உனக்கு பிடித்ததா..?” என்றேன். அப்போதும் அவர்கள். பிடித்தது என்றே சொன்னார்கள். பிறகு மிரட்டி கூட கேட்டுப்பார்த்து விட்டேன்.. அப்போதும் பிடித்தது என்றுதான் சொன்னார்கள்.. smile emoticonமகிழ்ச்சிதான். 
பிறகுதான்.. திரு. கே.என்.சிவராமன் அவர்களின் இந்தத் பதிவைப்பார்த்தேன். அத்தனை மகிழ்ச்சி. படத்தோடு சம்பந்தப்படாதவர். பத்திரிக்கையாளர் ஒருவரின் இந்தக்கருத்து.. உண்மையில் எங்களுக்கு மகிழ்ச்சியை கொடுக்கிறது. படத்தைக் குறித்தான நம்பிக்கை அதிகரிக்கிறது. நன்றி சார்.

படத்தைப்பற்றி பேசுவதற்கு நிறைய இருக்கிறது. அதன் ஒளிப்பதிவு பற்றியும், பயன்படுத்திய கேமரா, கருவிகள் மற்றும் ஒளியமைப்பு முறைகளைப்பற்றியும் பேசுவோம். அதை பிரிதொரு கட்டுரையில் எழுதுகிறேன். அதற்கு முன்பாக, படம் வரும் ஜனவரி ஒன்றாம் தேதி வெளியாகிறது. நீங்களும் தவறாமல் பார்த்துவிடுங்கள். 

Saturday, December 12, 2015

'ஒளிப்பதிவு பயிற்சிப் பட்டறை' பெங்களூரு (Cinematography Workshop - Bengaluru)

'ஒளிப்பதிவு பயிற்சிப் பட்டறை' பெங்களூரு. (Cinematography Workshop - Bengaluru) 

கடந்த முறை நடந்த பயிற்சி பட்டறைக்கு 'திரு.பிரசன்னா' அவர்கள் பெங்களூருவிலிருந்து வந்து கலந்துகொண்டார். வரும் 26/27 தேதிகளில் நடக்கவிருக்கும் ஒளிப்பதிவு பயிற்சிப் பட்டறை' (Cinematography Workshop) அவரின் விருப்பத்தினாலும்/ஏற்பாட்டாலும் தான் நடக்கிறது

சென்னை பயிற்சி பட்டறையை தவற விட்ட நண்பர்கள் இப்பயிற்சி பட்டறையைப் பயன்படுத்திக்கொள்ளலாம். சென்னை மற்றும் தமிழ்நாட்டிலிருந்து வரும் நண்பர்கள் இரவு தங்கவும் வசதியிருப்பதாக சொன்னார். அதற்கு தனியாக கட்டணம் செலுத்த வேண்டியதிருக்கும். விருப்பம் தெரிவிக்கும் நபர்களின் எண்ணிக்கையைப் பொறுத்து கட்டணம் குறையும்/மாறும் என்று நினைக்கிறேன்

Contact: 
Prasanna kumar, 
+91 97405 98888, prasannavirggo@gmail.com

நண்பர்கள் பயன்படுத்திக்கொள்ளுங்கள்


Thursday, December 10, 2015

Cinematography Workshop in Bengaluru

நண்பர்கள் கவனத்திற்கு..

'ஒளிப்பதிவு பயிற்சிப் பட்டறை' (Cinematography Workshop)

சென்னையில் கடந்த மாதம் 'ஒளிப்பதிவு பயிற்சிப் பட்டறை' (Cinematography Workshop) நடந்ததை அறிந்திருப்பீர்கள். அதே போன்றதொரு ஒளிப்பதிவு பயிற்சிப் பட்டறையை இம்மாதம்(Dec) 26/27 இரண்டு நாட்கள் 'பெங்களூரில்' (Bengaluru) நடத்த கேட்டிருக்கிறார்கள். ஒளிப்பதிவு குறித்தான இப்பயிற்சி பட்டறை, ஒருநாள் தியரி வகுப்பாகவும், மறுநாள் பிராக்டிக்கல் வகுப்பாகவும் இருக்கும். நானும், ஒளிப்பதிவாளர் திரு.ஞானமும் இவ்வகுப்பை நடத்துகிறோம்.

கடந்த முறை, பல நண்பர்களுக்கு தகவல் தெரிவிக்க முடியாமல் போய் விட்டது. இம்முறை நடக்கவிருக்கும் ஒளிப்பதிவு பயிற்சிப் பட்டறையைப்பற்றிய மேலும் விவரங்களை விரைவில் தெரிவிக்கிறேன். விருப்பம் கொண்ட நண்பர்கள் கலந்துக்கொள்ளலாம். கட்டணம் உண்டு.

முந்தைய பட்டறையை குறித்து திரு.அருண் அவர்கள் எழுதிய பதிவை இங்கே இணைத்திருக்கிறேன்.
-----------------------


தமிழ் ஸ்டுடியோவின் இரண்டு நாள் ஒளிப்பதிவு பயிற்சிப் பட்டறை - நன்றி...

நண்பர்களே கடந்த சனி மற்றும் ஞாயிற்றுக்கிழமை இரண்டு நாட்களும், தமிழ் ஸ்டுடியோவின் சார்பாக ஒருங்கிணைக்கப்பட்ட ஒளிப்பதிவு பயிற்சிப் பட்டறை சிறப்பாக நடந்து முடிந்தது. ஒளிப்பதிவாளர்கள் விஜய் ஆர்ம்ஸ்ட்ராங், ஞானம் சுப்பிரமணியன் இருவரும் மிக சிறப்பாக பயிற்சியளித்தார்கள். தமிழ் சினிமா சரியாக கவனிக்காமல் விட்டுவிட்ட இரண்டு பொக்கிஷங்கள் இவர்கள். குறிப்பாக ஒளிப்பதிவு பற்றி கற்றுக்கொடுக்கும் தளத்தில் இருவரும் புதிய பரிமாணத்தை தோற்றுவித்துள்ளார்கள். இந்த இரண்டு நாள் பயிற்சிப் பட்டறைக்காக இருவரும் கிட்டத்தட்ட இரண்டு மாதங்கள் கடுமையாக இரவும் பகலும் உழைத்திருக்கிறார்கள். ஒவ்வொரு நாளும், என்னை அழைத்து இப்படி செய்யலாமா, இன்ன மாதிரி புதிய கருவிகளை பயன்படுத்தி சொல்லிக்கொடுப்போமா என்றெல்லாம் கேட்டுக்கொண்டே இருந்தார்கள். நானே ஒரு சமயத்தில் அட இவ்வளவு மெனக்கெட வேண்டுமா என்றே கேட்டுவிட்டேன். ஆனால் எவ்விதத்திலும் தொய்வில்லாமல், தாங்கள் எடுத்துக்கொண்ட காரியத்தில் அத்தனை சிரத்தையாக வேலை செய்து, ஒளிப்பதிவு பயிற்சிப் பட்டறை அத்தனை சிறப்பாக முடித்துக்கொடுத்துள்ளார்கள்.

இரண்டு மாதங்களாக கடுமையாக உழைத்து அவர்கள் வழிநடத்திய இந்த பயிற்சிப் பட்டறையின் வெற்றியை கலந்துக்கொண்ட நண்பர்களின் மகிழ்ச்சி நிறைந்த வார்த்தைகளில் காண முடிகிறது. சுமார் நாற்பத்தி நான்கு நண்பர்கள் கலந்துக்கொண்டார்கள். ஒவ்வொருவரும் ஒளிப்பதிவு பற்றி பல்வேறு புரிதலை, தேடலை வைத்திருந்தார்கள். அத்தனை நண்பர்களையும் சேர்ந்தாற்போல மனநிறைவுக் கொள்ள செய்வது அத்தனை சுலபமான செயல் அல்ல. ஆனால் ஆர்ம்ஸ்ட்ராங், ஞானம் இருவரும் அதனை சாதித்துக் காட்டியிருக்கிறார்கள். முதல் நாள் ஒளிப்பதிவு பற்றிய தேற்றங்களையும், இரண்டாவது நாள், ரெட் கேமரா, லைட்டிங் ஆகியவற்றை வைத்து செய்முறை பயிற்சியாகவும் நடத்தினார்கள். இரண்டு நாள் பயிற்சிப் பட்டறையில் பெரிதாக என்ன சாதித்துவிட முடியும் என்று நினைக்கும் நண்பர்கள் அடுத்த பயிற்சிப் பட்டறையில் கலந்துக்கொள்ளுங்கள். உங்களுக்கே உண்மை புரியும். அல்லது புகைப்படங்களை பாருங்கள். ஒரு குறிப்பிட்ட காட்சிக்கு எப்படி லைட்டிங் செய்ய வேண்டும், அதன் கோணத்தை எப்படி இறுதி செய்வது, அதற்கான ஷாட் அமைப்பது எப்படி, கேமராவில் அதனை படம் பிடிக்கும் முன்னர் எப்படியான உத்திகளை கடைபிடிக்க வேண்டும் என்று வகுப்பெடுக்கும்போது, நானும் மெய்மரந்துக் கேட்டுக்கொண்டிருந்தேன். என்னுடைய இயக்கம் சார்ந்த பட்டப்படிப்பை லண்டனில் பயின்றபோது முதல் வருடம் முழுக்க ஒளிப்பதிவு பற்றிய வகுப்புதான். அப்போது கூட சில நாட்கள் தொய்வடைந்திருக்கிறேன். ஆனால் இந்த இரண்டு நாட்களும் மீண்டும் என்னை புதுப்பித்துக்கொள்ள முடிந்தது.

ஆர்ம்ஸ்ட்ராங், ஞானம் இருவரையும் தமிழ்நாட்டில் உள்ள, அல்லது தமிழர்கள் உள்ள நாடுகளில் எல்லாம் அழைத்து ஒளிப்பதிவு தொடர்பான பயிற்சியை ஏற்பாடு செய்ய வேண்டும். கற்றுக்கொடுப்பது எல்லாருக்கும் வாய்க்கும் கலை அல்ல. அது ஒரு சிலருக்கு மட்டுமே வாய்க்கும் மாபெரும் கலை. நாம் கற்ற பாடம், மற்றவர்களுக்கு கற்றுக்கொடுக்கும்போது மட்டுமே முழுமையடையும் என்கிறே ஆர்ம்ஸ்ட்ராங்கின் வார்த்தைகள் அத்தனை நிதர்சனமானது. தமிழ்நாட்டில் உள்ள திரைப்படக் கலையை கற்றுக்கொடுக்கும் கல்லூரிகள், தனியார் நிறுவனங்கள் எல்லாரும் இவர்கள் இருவரையும் பயன்படுத்திக் கொள்ள வேண்டும். அடுத்த அடுத்தக் கட்ட முழுமையான மாணவர்களை உருவாக்க பேருதவி புரியும் என்று நினைக்கிறேன்.

இரண்டு மாதம் கடுமையான உழைப்பு, நிறைவான பயிற்சி என இத்தனை மெனக்கெடல் இருந்தாலும், இரண்டு கலைஞர்களும், இந்த பயிற்சியை தமிழ் ஸ்டுடியோவின் படச்சுருள் மாத இதழுக்காக நிதி திரட்டவே நடத்திக் கொடுத்தார்கள். ஒரு ரூபாய் கூட இருவரும் கேட்கவில்லை. கொடுக்கப்படவும் இல்லை. பயிற்சியின் மூலமாக இரண்டு மாதம் படச்சுருள் இதழை கொண்டு வருவதற்கான நிதி கிடைத்துள்ளது. இன்னும் செலவை குறைத்திருந்தால், இன்னொரு மாதத்திற்கான நிதி கிடைத்திருக்கும். ஆனால் எந்த விசயத்திலும், எள்ளளவும் சமரசம் இல்லாமல்தான் ஒவ்வொரு பயிற்சியையும் நடத்திக்கொண்டிருக்கிறோம். முதலில் இயக்குனர் மிஷ்கின் நடத்திய பயிற்சிப் பட்டறை, இப்போது ஒளிப்பதிவு சார்ந்த பயிற்சிப் பட்டறை என இரண்டிலும் கலந்துக்கொண்ட அத்தனை நண்பர்களும் நிறைவாகவே உணர்ந்தனர். ஒருவர் கூட எதிர்மறையான கருத்தை தெரிவிக்கவில்லை. குறுகிய கால பயிற்சி நடத்த வேண்டாம் என்பதே என்னுடை எண்ணமாக இருந்தது. ஆனால் இந்த இரண்டுப் பயிற்சிப் பட்டறைகளும் அதனை தகர்த்துவிட்டது. இத்தனை நேர்த்தியாக நடத்த  முடியும் என்றால் நிச்சயம் அடுத்தடுத்து பயிற்சிப் பட்டறை நடக்கும்.

தமிழ்நாட்டில் இதற்கு முன்னதாக வேறெங்கும் இப்படியான செய் நேர்த்தியான ஒரு ஒளிப்பதிவு பயிற்சிப் பட்டறை நடந்ததில்லை என்றே கூறலாம். அத்தனை அருமையாக செய்முறை விளக்கங்களுக்கான அத்தனை உபகரணங்களையும் வரவழைத்து, இத்தனைக்கும் கடுமையான மழை நேரத்திலும் சிறிய சமரசம் கூட செய்துக் கொள்ளாமல் அதனை திறம்பட செய்து முடித்தார்கள். கடுமையான மழையிலும் பயிற்சியை சிறப்பாக நடத்த ஒத்துழைத்த லைட்டிங் தொழில்நுட்பக் கலைஞர்கள், ரெட் கேமரா கலைஞர்கள் என அனைவருக்கும் தமிழ் ஸ்டுடியோவின் நன்றியை தெரிவித்துக் கொள்கிறேன்.

வெறுமனே ஒளிப்பதிவு பயிற்சி என்று மட்டுமல்லாமல், ஒளிப்பதிவு செய்து முடித்த காட்சியை எப்படி DI செய்வது, அதனை எப்படி படத்தொகுப்பு செய்வது என்பன போன்ற வேறு சில வகுப்பும் நடந்தது. DI கலைஞர் ஷ்யாம், படத்தொகுப்பாளர் பிரசன்னா ஆகிய இருவருக்கும் தமிழ் ஸ்டுடியோவின் நன்றியை தெரிவித்துக்கொள்கிறேன். இவர்கள் இருவரும் கூட ஒரு ரூபாய் கூட பணம் கேட்கவில்லை, கொடுக்கப்படவும் இல்லை.

இரண்டு நாள் ஒளிப்பதிவு பயிற்சிப் பட்டறையில் கலந்துக்கொண்ட நண்பர்களுக்கு தமிழ் ஸ்டுடியோவின் நன்றியை தெரிவித்துக்கொள்கிறேன். ஒளிப்பதிவாளர்கள் ஆர்ம்ஸ்ட்ராங், ஞானம் சுப்பிரமணியன் இருவருக்கும் தமிழ் ஸ்டுடியோ சார்பாக, கலந்துக்கொண்ட நண்பர்கள் சார்பாக, படச்சுருள் வாசகர்கள் சார்பாக பெரும் நன்றியை தெரிவித்துக்கொள்கிறேன். உங்கள் உழைப்பிற்கும் கற்றுக்கொடுத்த நேர்த்திக்கும், படச்சுருள் இதழுக்காக நிதித்திரட்ட ஒரு ரூபாய் கூட பெறாத நேர்மைக்கும் எனது வந்தனங்கள்.