Tuesday, March 29, 2011

Red One 'EPIC' - ஒரு அறிமுகம்

"புதிய தொழில்நுட்பம் உங்கள் மீது உருண்டோடும் போது, நீங்கள் அந்த உருளையின் (ரோட் ரோலரின்) ஒரு பகுதியாக இல்லாவிட்டால் தரையின் ஒரு பகுதியாகிவிடுவீர்கள்"


“Once a new technology rolls over you, if you're not part of the steamroller, you're part of the road.” - Stewart Brand
---------------------------------------------------------------------------------------------------------------
திரைப்படத் துறையில் நாளுக்கு நாள் தொழில்நுட்பம் வளர்ந்துகொண்டே வருகிறது. குறிப்பாக 'டிஜிட்டல்' திரைப்படம் என்னும் நுட்பம் வளர்ந்துவரும் வளர்ச்சியை நாம் கவனிக்கத் தவறிவிடக்கூடாது. 'டிஜிட்டல்' திரைப்படம் என்பது ஒளிப்பதிவு, ஒலிப்பதிவு, வண்ணம் ஒழுங்கமைத்தல் (color correction) மற்றும் திரையிடல் என அனைத்தையும்தான் குறிக்கிறது.

ஒரு திரைப்படத் தயாரிப்பின் மொத்த வேலைகளையும் 'டிஜிட்டல்' தொழில்நுட்பத்தில் செய்துவிட முடியும் என்பது இன்றைய நிதர்சனம். 'டிஜிட்டல்' தொழில்நுட்பம் இத்தனை தூரம் வளர்ந்துவிட்ட பிறகும், நாம் ஏன் அதைச் செயல்படுத்தாமல் அதைப்பற்றி பேசிக்கொண்டு மட்டுமே இருக்கிறோம் என்பது மிக முக்கியமான கேள்வி.

எது எப்படியோ, டிஜிட்டல் தொழில்நுட்பத்தில் பிம்பத்தைப் பதிவு செய்ய இன்னும் இங்கே தயக்கம் இருக்கிறது. அதாவது ஃபிலிமில் படமெடுப்பதற்குப் பதிலாக டிஜிட்டலை பயன்படுத்துவதற்கு கொஞ்சம் தயக்கம் காட்டப்படுகிறது. இங்கே குறைந்த செலவில் படமெடுப்பதற்காக மட்டும்தான் டிஜிட்டலை பயன்படுத்துகிறார்கள். பொருளாதாரம் பிரச்சனை இல்லை என்றால் ஃபிலிமையே எல்லோரும் முன்மொழிகிறார்கள்.

ஒரு துறையில் தொழில்நுட்ப வளர்ச்சி என்பது அத்துறையை அடுத்த கட்டத்திற்கு கொண்டு செல்வதாக இருக்கும், இருக்கவேண்டும். அந்த வகையில் இந்த டிஜிட்டல் தொழில்நுட்பம் திரைப்படத்துறையை அடுத்த கட்டத்திற்கு நகர்த்தும் விதத்தில் இருக்கிறதா? இருக்கிறது என்றால், ஏன் இந்த தயக்கம்? இந்தத் தயக்கம் நியாயமானதுதானா? போன்ற கேள்விகள் தொக்கி நிற்கத்தான் செய்கின்றன.

மறுக்க முடியாத உண்மை ஒன்று இருக்கிறது. ஃபிலிம் தரத்தை இதுவரை எந்த டிஜிட்டல் தொழில்நுட்பமும் சந்தேகத்திற்கு இடமின்றி சமன் செய்யவில்லை. ஒரு பேச்சுக்கு வைத்துக்கொள்வோமே, டிஜிட்டல் தொழில்நுட்பம் முன்பே கண்டுபிடிக்கப்பட்டிருந்து, நாம் இந்தனை காலமாக அதைத்தான் பயன்படுத்தி வந்திருந்தோமென்றும், இப்போது புதிதாக 'ஃபிலிம்' தொழில்நுட்பம் கண்டு பிடிக்கப்பட்டிருந்தால் என்ன ஆகியிருக்கும்? நாம் அத்தனைபேரும் 'ஃபிலிமை' தலையில் தூக்கி வைத்து கொண்டாடி இருப்போம். ஆகா, இது ஒரு அற்புதம் என்று அதிசயப்பட்டிருப்போம்.

உண்மைதான், ஃபிலிம் அத்தனை சக்தி வாய்ந்ததுதான், பல சாத்தியங்களை 'ஒரு காட்சியைப் பதிவுசெய்தலில்' அது கொடுக்கிறது. அதை யாரும் மறுத்துவிட முடியாது. என்றாலும் நாம் அதைத்தாண்டி செல்லவேண்டிய காலகட்டத்தில் இருக்கிறோம். முந்தைய படி எத்தகைய உறுதியானதாகயிருந்தாலும் நாம் அடுத்த படியில் காலெடுத்துவைத்துதான் ஆக வேண்டும், அப்போதுதான் மேலேற முடியும், அடுத்தக் கட்டத்திற்கு நகர முடியும். அதைத் தவிர்த்து முந்தைய படி பாதுகாப்பாக இருக்கிறது, நான் இங்கேயே நின்று கொள்கிறேன் என்று சொல்வது அவரவர் சவுகரியம். ஆனால் அது விவேகமோ, வளர்ச்சியோ ஆகாது.

இப்படி, நாம் பலவற்றைச் சிறந்தது என்றாலும் கடந்துவந்திருக்கிறோம், நம் வாழ்கையிலேயே எண்ணற்ற உதாரணங்கள் உண்டு, மண்பாண்ட சமையல், கைக்குத்தல் அரிசி, பட்டுப்புடவை, மருத்துவம் என பல நல்ல விஷயங்களை நாம் கால ஓட்டத்தில் தாண்டி வந்திருக்கிறோம். அதற்கான நியாயமான காரணங்களும் உண்டு என்பது நம் நம்பிக்கை.

அதேபோல்தான் ஃபிலிம் எத்தகைய சிறப்பு வாய்ந்ததாகயிருப்பினும் விரைவில் நாம் அதைத்தாண்டி வந்துவிட வேண்டிய சூழலில் இருக்கிறோம்.

இத்தகைய பீடிகையும், சமாளிப்பும், சிபாரிசும் டிஜிட்டல் தொழில்நுட்பத்திற்குத் தேவையா? அது அத்தகைய நிலையிலா இருக்கிறது?. அதன் தரம் சிபாரிசு தேடும் நிலையில்தான் இருக்கிறதா? என்று என்னைக் கேட்டால்... அப்படி இல்லை என்றுதான் சொல்வேன்.

டிஜிட்டல் தொழில்நுட்பம் ஃபிலிம் தரத்திற்கு சில காரணிகளில் வேண்டுமானால் ஈடுசெய்யாமல் இருக்கலாம், ஆனால் பெரும்பான்மையானவற்றில் ஈடு செய்துவிட்டது என்பதும், சில விதங்களில் ஃபிலிமை விட டிஜிட்டல் மேம்பட்டது என்பதும், பல சாத்தியங்களுக்கு வழியேற்படுத்திக் கொடுத்திருக்கிறது என்பதும் இன்று உலகம் ஒத்துக்கொண்ட உண்மை, அதுவும் குறைந்த விலையில்.

டிஜிட்டல் திரைப்படத்தயாரிப்பைத் தரத்தோடு செய்ய முடியும் என்ற எண்ணம் 'ரெட் ஒன்' (RED ONE) வருவதற்கு முன்பாக வெறும் நம்பிக்கையாக மட்டும்தான் இருந்தது. 'சோனி', 'பேனாசோனிக்' போன்ற நிறுவனங்கள் 'HD' தொழில்நுட்பத்தை முயன்றுகொண்டிருந்த காலகட்டத்தில் 'ரெட் ஒன்' அறிமுகப்படுத்தப்பட்டது (2007).

'ரெட் ஒன்' 'HD' தொழில்நுட்பத்தைத்தாண்டி டிஜிட்டல் திரைப்படத்தை நோக்கி நம்மைக் கொண்டு சென்றது, அது 'RAW' format-ஐ பயன்படுத்தி 4K தரத்தை எட்டியது என்பதை முந்தைய கட்டுரையில் பார்த்தோம்.

இப்போது 'SONY' (F35), 'ARRI' (D21, Alexa), 'Panavision' (GENESIS) போன்ற பல நிறுவனங்கள் டிஜிட்டல் கேமராக்களை அறிமுகப்படுத்திவிட்டன.


SONY F35
ARRI Alexa 
ARRI D-21

PANAVISION GENESIS
இதில் இடைச்செருகலாக, எதிர்பாராத ஆச்சரியமாக 'Canon' நிறுவனம் 'EOS 5D/7D'-ஐ மார்க்கெட்டுக்கு கொண்டு வந்து இன்பஅதிர்ச்சி கொடுத்திருக்கிறது. சிறிய வடிவத்தில் போதுமான தரம் என்பது இதன் சிறப்பம்சம்.

CANON 5D

இந்நிலையில் 'ரெட் ஒன்' அது அறிமுகமானபோது ஏற்படுத்திய அதே போன்றதொரு ஆச்சரியத்தோடு அதன் இரண்டு புதிய கேமராக்களை அறிமுகப்படுத்துகிறது.

Red One 'EPIC':

'ரெட் ஒன்' கேமராவில் மூன்றில் ஒருபங்கு அளவு கொண்ட சிறிய கேமரா இது. ஆனால் அதை விட அதிக தொழில்நுட்ப வளர்ச்சியைக் கொண்டது.



* 5K ரெசுலூஷன்.(5120 x 2700 PIXELS)

*120fps - நொடிக்கு 120 ஃபிரேம்ஸ் வரை படம் பிடிக்கலாம் (5K). 225fps வரை 2K-இல் படம்பிடிக்கலாம் (UP TO 225FPS @ 2K).

* ஒவ்வொரு ஃபிரேமும் 14MP கொண்டது.



*புகைப்படம் எடுக்கவும் பயன்படுத்தமுடியும்.

*13 stops 'native dynamic range' கொண்டது.

*3D படப்பிடிப்புக்கும் பயன்படுத்தலாம்.

*'Multi-camera synchronization'

*MYSTERIUM-X® - என்பது அதன் புதிய 'CCD'. ஒளியைப் பதிவுசெய்ய பயன்படும் சென்சார்.

*இதன் format ஆன 'R3D'-ஐ கீழே இருக்கும் எல்லா எடிட்டிங் மென்பொருளையும் பயன்படுத்தி எடிட் செய்யலாம். (Final Cut Pro, Avid DS, Adobe Premiere and After Effects, Sony Vegas, Assimilate Scratch, Filmlight Baselight, Quantel Pablo, Da Vinci, Nuke, REDCINE-X, ROCKETCINE-X, DVS Clipster, Nucoda, Mystika, Storm)


* லென்ஸ் மௌண்ட், பேட்டரி, சேமிக்கும் சிப், ஹார்ட்டிஸ்க் என எல்லாம் பாகங்களையும் தேவைக்கு ஏற்றபடி மாற்றிக்கொள்ள முடியும்.

*எலட்டரானிக் ரெட் லென்ஸையோ அல்லது 'கெனான்' அல்லது 'நிக்கான்' லென்ஸையோப் பயன்படுத்தி 'Auto Focus' 'Auto Exposure' வைக்கலாம்.

*HDRx™ தொழில்நுட்பத்தில் 18 stops ஒளி வித்தியாசம் கொண்ட காட்சிகளை படம்பிடிக்கமுடியும்.

HDRx™ தொழில்நுட்பம் என்பது 'High-dynamic-range imaging' என்பதின் சுருக்கம். அதாவது ஒரு வெளிப்புறப் படக்காட்சியை பதிவுசெய்ய முயற்சிக்கும் போது, அங்கே பல அளவுகளில் ஒளி மாறுபட்டிருந்தால் அதன் எல்லா ஒளி அளவுகளையும் நாம் பதிவுசெய்ய முடியாது. ஏனெனில் அதிக ஒளியை சரியாக பதிவுசெய்ய நாம் முயன்றால் குறைந்த ஒளிப்பகுதி பதிவாகாது, குறைந்த ஒளியை பதிவுசெய்ய முயன்றால் அதிக ஒளிப்பகுதி 'Bleach' ஆகிவிடும்.



இந்த குறைய பாட்டை போக்க 'Still Photography'இல் 'HDR' தொழில்நுட்பத்தைக் கொண்டுவந்தார்கள். இதன் மூலம் பல மாறுபட்ட அளவுகள் கொண்ட ஒளிகளை தனித்தனி படங்களாக எடுத்துக்கொண்டு, பிறகு கணினியை பயன்படுத்தியோ அல்லது அந்த கேமராவில் இருக்கும் வசதியைப் பயன்படுத்தியோ ஒரே புகைப்படமாக மாற்ற முடியும். இதன் மூலம் பல அளவுகளில் ஒளியமைப்பு கொண்ட காட்சியைச் சிறப்பாக பதிவு செய்யமுடியும். இந்த தொழில்நுட்பத்தைதான் 'எபிக்' பயன்படுத்துகிறது.






ஸ்கார்லெட் இன்னும் வெளிவரவில்லை-விரைவில்

'Lord of the Rings film trilogy' மற்றும் 'King Kong' போன்ற படங்களின் இயக்குனரான 'Peter Jackson' தன் அடுத்தப்படம் 'THE HOBBIT'-ஐ 'எபிக்'-ஐ பயன்படுத்தி எடுக்கிறாராம். அது ஒரு 3D டிஜிட்டல் படம்.



எல்லாம் சரிதான்.. ஆனால், தொழில்நுட்ப அறிவுக்கும், படைப்புத்திறனுக்குமான வித்தியாசத்தை உணர, 'ஐன்ஸ்டினின்' இந்த வார்த்தைகளை நாம் எப்போதும் நினைவில் கொள்ள வேண்டும்.

"I am enough of an artist to draw freely upon my imagination. Imagination is more important than knowledge. Knowledge is limited. Imagination encircles the world." -Albert Einstein

Sunday, March 27, 2011

'RED ONE' கேமரா ஒரு அறிமுகம்

இன்றைய நிலவரப்படி காட்சியை பதிவு செய்யும் தொழில்நுட்பத்தில் பல வகைகள் இருக்கின்றன. ஃபிலிம்(Film), டிஜிட்டல்(Digital) என்ற இரண்டு பொதுப் பிரிவுக்குள் அவற்றை அடக்கிவிட முடிந்தாலும் அதற்குள்ளும் நிறைய பிரிவுகள் இருக்கின்றன.

ஃபிலிம் என்று பொதுவாக அழைத்துவிட்டாலும், 65mm, 35mm, 16mm படச்சுருள்களில் எதைப் பயன்படுத்தினோம் என்பதைப் பொருத்து நம் காட்சியின் தரம் இருக்கிறது. ஒரு விதத்தில் இவை ஒவ்வொன்றுமே மற்றவற்றைவிட பாதியளவு தர வித்தியாசம் கொண்டவை. ஒரு பிம்பம் பதிவுசெய்யப்படும் பரப்பளவு சார்ந்து தரம் வித்தியாசப்படும் என்பது நாம் அறிந்ததுதான். அதாவது 65mm ஃபிலிமை விட 35mm ஃபிலிம் என்பது பாதி அளவு சிறியது, அதனால் பிம்பம் பதியப்படும் பரப்பளவு குறைகிறது. அதைச்சார்ந்து 'Image resolution' குறைகிறது. இது பிம்பதின் காட்சித் தரத்தைக் குறைக்கும். இதேதான் 35mm ஃபிலிமுக்கும் 16mm ஃபிலிமுக்குமான வித்தியாசம்.

என்றாலும் 35mm ஃபிலிமின் தரம் நமக்கு போதுமானது என்பதனால் 65mm ஃபிலிமை நாம் அவ்வளவாகப் பயன்படுத்துவதில்லை, இடையில் சில வருடங்கள் பயன்படுத்தியதோடு சரி. (அகண்ட திரையில் பிரம்மாண்ட காட்சிகளைக் காட்டுவதன் மூலம் பார்வையாளனை பிரமிப்பில் ஆழ்த்தி திரையரங்கை நோக்கி இழுத்துவந்துவிட வேண்டும் என்பதனால்). ஆனால் 16mm ஃபிலிமைப் பயன்படுத்துவது என்பது உண்மையில் நம் காட்சித் தரத்தை பாதிக்க கூடியது, அதிலிருந்து பெறப்படும் காட்சித்தரம் (Image resolution) என்பது 35mm ஃபிலிமோடு ஒப்பிட்டால் குறைவுதான்.

இந்த குறைபட்ட தரம் சில நேரங்களில், சில காட்சியமைப்புக்கு போதுமானதாக இருந்தாலும் பல காட்சிகளுக்கு, கதை சொல்லலுக்குப் போதுமானதாக இருக்காது என்பதும் உண்மை. உதாரணத்திற்கு குறைந்த வெளிச்சம் கொண்ட காட்சியமைப்பு, காதல் போன்ற மென்மையான உணர்ச்சிகளை காட்சியாக வெளிப்படுத்தும்போதும், 'Low resolution'-ஆல் ஏற்படும் 'Grains' பார்வையாளன் காட்சியில் முழுமையாக உட்செல்வதைத் தடுக்கிறது. சிறந்த நடிப்பும், சிறந்த காட்சிப்படுத்துதலும், சிறந்த இசையும் இந்த குறையை நிவர்த்தி செய்துவிடலாம் என்றாலும், இந்த 'Low resolution/ Grains' என்பது 16mm ஃபிலிமிலிருக்கும் தவிர்க்க முடியாத குறையாகும். இதையெல்லாம் மீறி நாம் 16mm-இல் படமெடுப்பது என்பது தவிர்க்க முடியாத 'விட்டுக்கொடுத்தல்'(Compromise) தான்.

அதே போல் 'டிஜிட்டல்' தொழில்நுட்பம் என்பதும் பல பிரிவுகளைக் கொண்டதுதான். 'அனலாக் விடியோவை'(VHS,Beta) தவிர்த்துவிட்டுப் பார்த்தால் 'Digi-beta'வில் ஆரம்பித்து 'DV','DVC Pro','XD','HDV','HD' என ஒரு நீண்ட தொடர் தொழில்நுட்பங்களைக் கொண்டிருக்கிறது இது. (இவற்றுக்கு இடையேயான வித்தியாசத்தை விளக்க ஒரு தனிக் கட்டுரையே எழுதவேண்டும். அதைப் பிறகு எழுதுகிறேன். இப்போதைக்கு வேண்டுமானால் இணையத்தில் தேடிப் படித்துக்கொள்ளுங்கள்)

திரைப்படத் தயாரிப்பில் செலவைக் குறைக்கவேண்டும் என்ற தேவை வரும்போதெல்லாம் யோசிக்கப்படும் பல மாற்று காரணிகளில் ஃபிலிமுக்காக செலவிடப்படும் பகுதியை குறைக்க வேண்டும் என்பதும் ஒன்று. ஃபிலிமுக்கு பதில் 'டிஜிட்டலை' பயன்படுத்தலாம் என்கிற யோசனை பலகாலமாக இருந்து வந்திருக்கிறது. டிஜிட்டல் என்பது வளர்ந்து வரும் தொழில்நுட்பம், மேலும் விலை குறைவானது என்பதனாலும், அதை எப்போதும் பரிசீலனை செய்து வந்திருக்கிறார்கள். ஆனால் 2005/2007 வரைக்கும் கூட டிஜிட்டல் தொழில்நுட்பம் பெரிதாக நம்பிக்கை தரும் வகையில் அல்லது போதுமான தரத்தில் முன்னேறி இருக்கவில்லை.

'Star Wars' போன்ற சில படங்களில் டிஜிட்டல் தொழில்நுட்பம்(DV/24p) பயன்படுத்தப்பட்டிருந்தாலும் அவையெல்லாம தேவை கருதியும் பரீட்சார்த்த முறையிலுமே பயன்படுத்தப்பட்டது. பின்பு 'HD' தொழில்நுட்பம் திரைப்படத்துறையில் அறிமுகப்படுத்தப்பட்டு, பயன்பாட்டிற்கு கொண்டுவர முயற்சிகள் மேற்கொள்ளப்பட்டன.

கமலின் 'மும்மை எக்ஸ்பிரஸ்' DV/24p (Panasonic AG-DVX100 அல்லது AG-DVX102A) தொழில்நுட்பத்தைப் பயன்படுத்தி எடுக்கப்பட்டது. ஒளிப்பதிவு செய்தது ஒளிப்பதிவாளர் சித்தார்த் அவர்கள். அந்த கேமராவில் நொடிக்கு 24 பிரேம்கள் எடுக்க முடியும் என்பதே அதைப் பயன்படுத்தி அப்போது திரைப்படம் எடுக்க முயன்றார்கள்.

AG-DVX102A
AG-DVX100

இந்தியாவில்/தமிழில் முதல் 'HD' படம் ஒளிப்பதிவாளர் 'பி.சி.ஸ்ரீராம்' இயக்கி, ஒளிப்பதிவு செய்த 'வானம் வசப்படும் (2004)'. அதில் 'Panasonic AJ HDC 27'(720p) பயன்படுத்தப்பட்டது என நினைக்கிறேன். பின்பு இதே கேமரா பயன்படுத்தப்பட்டு 'சேரன்' இயக்கி 'M.S.பிரபு' அவர்கள் ஒளிப்பதிவு செய்த 'தவமாய் தவமிருந்து' திரைப்படம் எடுக்கப்பட்டது. சேரனின் முந்தய படமான 'ஆட்டோகிராப்பில்' இந்த கேமரா சில காட்சிகளுக்குப் பயன்படுத்தப்பட்டது, ஒளிப்பதிவு செய்தது ஒளிப்பதிவாளர் 'துவாரகநாத்' அவர்கள்.


Panasonic AJ HDC 27

ஆனாலும் அப்போதைய HD தொழில்நுட்பம் திருப்திகரமாக இருக்கவில்லை என்பதுதான் உண்மை. ஃபிலிம் தரத்திற்கு இல்லையென்றாலும் குறைந்தபட்சம் அதன் அருகில் வந்துவிடும் தொழில்நுட்பமாக வளர்ந்துவிடக்கூடிய சாத்தியம் கொண்டதாக கருதப்பட்டது.

ஒரு புறம் ஃபிலிமுக்கு மாற்றாக டிஜிட்டல் ஆலோசிக்கப்பட்ட அதே நேரத்தில் 'DI' மற்றும் 'டிஜிட்டல் திரையிடல்' (Digital Projection) போன்ற தொழில்நுட்பங்களும் நடைமுறைக்கு வந்தன. இந்தத் தொழில்நுட்பங்களின் சாத்தியங்களைப் பயன்படுத்திகொண்டு திரைப்படத்தயாரிப்பில் செலவை குறைக்கும் முயற்சிகள் மேற்கொள்ளப்பட்டது.



இந்த காலகட்டத்தில்தான் 'RED ONE' கேமராவைப் பற்றி பேச்சு அடிபட ஆரம்பித்தது. அதன் தயாரிப்பாளர்கள் சொன்ன அதன் தொழில்நுட்பம் முதலில் நம்ப முடியாததாகவும், சாத்தியம் இல்லாததாகவும் கருதப்பட்டது.



'HD' தொழில்நுட்பம் என்பது '1920 X 1080' 'ஃபிக்சல் ரேஷியோவை'(Pixel Ratio) நோக்கி இருந்தபோது 'RED ONE' கேமரா '4096 X 2304' ஃபிக்சல் ரேஷியோவை(4K Resolution) தரும் என்று சொல்லப்பட்டதும், கேமராவின் அளவும், அதன் விலையும் நம்பமுடியாததாக கருதப்பட்டது.



2005-இல் 'RED ONE'க்கான அறிவிப்பும் வேலையும் துவங்கப்பட்டாலும், 2007-இல் முதல் 'RED ONE' கேமரா தொழில்ரீதியான நடைமுறைக்கு வந்தது. 'RED ONE' கேமரா மற்ற டிஜிட்டல் கேமராக்களைப்போன்று 'HD' தொழில்நுட்பத்தில் இல்லாமல் 'RAW' format தொழில்நுட்பத்தைப் பயன்படுத்தியது. புகைப்படத்துறையில் பயன்பாட்டிலிருந்த 'RAW' தொழில்நுட்பத்தைப் பயன்படுத்தியதும், 4K ரெசுலுஷனைக் கொடுத்ததும் 'RED ONE'-இன் சிறப்பு அம்சங்கள்.



'RED ONE' அதன் அறிமுகப்படுத்தலிலிருந்து கொஞ்சம் கொஞ்சமாகத் தன்னை மேம்படுத்திக்கொண்டு வந்திருக்கிறது. 4Kவிலிருந்து 4.5K(4520 x 2540 pixels) மேம்பட்டதும், பதிவு செய்யும் கோடாக்கை மாற்றியும் (REDCODE 42), குறைந்த வெளிச்சத்தில் படம்பிடிக்கும் தகுதியை அதிகபடுத்தியும் (Mysterium-X) தன்னை வளர்த்துக்கொண்டே வருகிறது.

தமிழில் 'ரெட் ஒன்' கேமராவைப் பயன்படுத்திப் பல படங்கள் எடுக்கப்பட்டிருக்கின்றன. 'உன்னைப்போல் ஒருவன்', 'தமிழ்படம்', 'திருதிரு துருதுரு' மற்றும் 'மன்மதன் அம்பு' போன்ற படங்களில் முழுமையாக 'ரெட் ஒன்' பயன்படுத்தப்பட்டிருக்கிறது.





ஆங்கிலத்தில் பல படங்கள், 'ரெட் ஒன்'-ஐப் பயன்படுத்தி எடுக்கப்பட்டிருக்கின்றன. அதில் எனக்கு ரொம்ப பிடித்தது, இயக்குனர் 'Steven Soderbergh'-இன் 'சே' படம். இரண்டு பாகமாக எடுக்கப்பட்டிருக்கிறது.



தொழில்நுட்ப விவரங்கள்:

SENSOR                                   14 MEGAPIXEL MYSTERIUM-X™

PIXEL ARRAY                         5120 (h) x 2700 (v)

S/N RATIO                               66db

DYNAMIC RANGE                13+ stops

MAX IMAGE AREA              4480 (h) x 2304 (v)

LENS COVERAGE                 24.2mm (h) x 12.5mm (v) x 27.3 mm (d)

DEPTH OF FIELD                  Equivalent to S35mm (Motion) lens
                                                  Equivalent to 16mm (Motion) lens in 2K RAW

ACQUISITION FORMATS      4.5K RAW (2.4:1)
                                                     4K RAW (16:9, HD, 2:1, and Anamorphic 2:1)
                                                     3K RAW (16:9, 2:1, and Anamorphic 2:1)
                                                     2K RAW (16:9, 2:1, and Anamorphic 2:1)

PROJECT FRAME RATES      23.98, 24, 25, 29.97 fps @ 4.5K, 4K
                                                      plus 50, 59.94fps @ 3K, 2K

DELIVERY FORMATS *         4K : DPX, TIFF, OpenEXR (RED RAY via optional encoder)
                                                     2K : DPX, TIFF, OpenEXR (RED RAY via optional encoder)
                                                     1080p RGB or 4:2:2, 720p 4:2:2 : Quicktime, JPEG
                                                     Avid AAF, MXF. 1080p 4.2.0, 720p 4:2:0 : H.264, .MP4

MONITOR OUTPUTS              HD-SDI and HDMI with Frame Guides and Look Around
                                                     720p RGB or 4:2:2
                                                     SMPTE Timecode, HANC Metadata, 24-bit 48Khz Audio

DIGITAL MEDIA                      REDFLASH (CF) Module : (16GB Media)
                                                      RED SSD™ (64GB, 128GB, 256GB Capacity)

REDCODE™                              12-bit RAW : RC28, 36, 42 Quaity Levels
                                                      1-30 fps 4.5K, 4K
                                                      1-60 fps 3K
                                                      1-120 fps 2K

AUDIO                                         4 channel, uncompressed, 24 bit, 48KHz.

MONITORING OPTIONS   RED LCD 5" Flat Panel Display
                                                 RED PRO LCD 7" Flat Panel Display
                                                 BOMB EVF™ High Definition Viewfinder

REMOTE CONTROL          USB-2, GPI Trigger

WEIGHT                                10lbs. Body

CONSTRUCTION                 Aluminum Alloy

TEMPERATURE RANGES  Operating Range: 0˚C to +40˚C (32˚F to 104˚F)
                                                  Storage Range: -20˚C to +50˚C (-4˚F to 122˚F)

* FROM REDCINE-X


அடுத்த கட்டம்: ரெட் ஒன் கேமரா அடுத்தக்கட்டத்தை நோக்கியும் நகர துவங்கி விட்டது. Canon 5D/7D போன்ற போட்டியாளர்களை சமாளிக்க மேலும் புதிய வகை கேமராக்களை, வசதிகளை அளிக்கிறது. அந்த வகையில் அதன் இரண்டு புதிய கேமராக்களான 'EPIC' மற்றும் 'SCARLET' பற்றி அடுத்த கட்டுரையில் பார்ப்போம்.





Thursday, March 24, 2011

தலைவன் கொண்ட பாதை


உலகம் சந்தித்தப் பெரும் அழிவுகளில் ஒன்றான இரண்டாம் உலகப் போருக்கும், பதினேழு மில்லியன் மக்கள் கொல்லப்பட்டதற்கும் காரணமாகயிருந்த 'அடால்ஃப் ஹிட்லர்' இரண்டாம் உலகப்போர் துவங்குவதற்கு முன்பே கொல்லப்பட்டிருந்தால், ‘அக்கொலை, குற்றம் என கருதப்படுமா? ஹிட்லரைக் கொன்றவன் கொலைகாரனா? அல்லது நாயகனா?’ ஒரு விதத்தில் பெரும் அழிவைத் தடுத்ததாகவும், மறுவிதத்தில் சக மனிதனைக் கொல்வது குற்றம் என்றும் ஆகிறது. இதன்படி கொன்றவன் குற்றவாளியா? நாயகனா? என்றொரு கேள்வியை எப்போதோ ஒரு கட்டுரையில் படித்திருக்கிறேன்.

அப்போது தோன்றியிருக்கிறது, அப்படி நடந்திருந்தால் நன்றாக இருந்திருக்கும் அல்லவா என்று. ஹிட்லர் ஒருவர் கொல்லப்பட்டிருந்தால் இவ்வுலகம் பெரும் அழிவிலிருந்து தப்பித்திருக்கும் என்ற என் அறியாமையை இப்போது நினைத்து நொந்து கொள்கிறேன். ஹிட்லர் இல்லை என்றால் என்ன? அவரைப்போலவே அல்லது அவரை விட பல மடங்கு பலம் பொருந்திய கனவான்கள் பலர் உண்டு இவ்வுலகில் என்ற உண்மையை கடந்துபோன வருடங்கள் நமக்கு அடையாளம் காட்டியிருக்கின்றன.

நினைத்துப்பார்க்க.. நன்றாகத்தான் இருக்கிறது. அப்படிப்பட்ட தலைவர்களை மட்டும் கொல்ல முடிந்திருந்தால் எப்படி இருக்கும்..!? அதுவும் அவர்கள் அத்தகைய அழிவுகளைத் துவங்குவதற்கு முன்பாகவே. இயக்குனர் 'ஸ்டிபன் ஸ்பில்பெர்க்கின்' படமான 'மைனாரிட்டி ரிப்போர்ட்'-இல் குற்றங்களை முன்கூட்டியே தடுப்பதற்கு ஒரு வழிமுறை பின்பற்றப்படும். கதைக்களம் பிற்காலத்தில் (future) நடப்பதாக சித்தரிக்கப்பட்ட அப்படத்தில் ஒரு குற்றம் நடைபெறுவதற்கு முன்பாகவே அதைப்பற்றி தெரிந்துக்கொண்டு அதைத் தடுப்பார்கள். அதாவது, அக்குற்றம் செய்பவனை குற்றச்செயல் செய்வதற்கு முன்பாகவே கைது செய்து சிறையில் அடைப்பார்கள். குற்றம் செய்யாத போதும் அதற்கான விருப்பமும் நோக்கமும் அதை நிகழ்த்திவிடக்கூடிய சாத்தியமும் அவனுக்கு இருந்ததனால், அவனை குற்றவாளியாகக் கருதி, அதற்கான தண்டனையையும் அவனுக்கு வழங்குவார்கள். பிற்காலத்தில் இப்படிக்கூட குற்றங்களைத் தடுக்கலாம் என்ற கற்பனை கதை அது. ஆனால் அதிலிருக்கும் சாத்தியம் வரும் காலத்தில் உண்மையானால் நன்றாக இருக்கும் என்று நினைக்கத் தோன்றுகிறது.

'அடால்ஃப் ஹிட்லர்' வரலாற்றில் ஒரு வில்லனாகத்தான் அடையாளப்படுத்தப்படுகிறார். அது, ஒரு விதத்தில் சரிதான். மற்றொரு விதத்தில், அவரது வாழ்க்கையின் நியாயமற்ற குரூரத்தின் வார்ப்பு அவர். ஹிட்லருக்கு இரண்டு வித அடையாளங்களைக் கொடுக்கமுடியும். நாயகன், வில்லன் என இரண்டும் முகங்களுமே அவருக்குப் பொருந்தும்.

தேசத்தின் கடைக்கோடியிலிருந்து எழுந்து வந்த ஒரு சராசரிக்கும் கீழான மனிதன், அத்தேசத்தையே ஆண்டான். வறுமையிலும் புறக்கணிப்பிலும் வளர்ந்தவன் தேசத்தின் தலைவனானான். முதலாம் உலகப்போரில் அவன் தேசம் கண்ட இழப்பும், துயரமுமே ஹிட்லரை ஒரு தலைவனாக்கியது. அதுவே ஒரு பெரும் தேசத்தைக் கட்டமைக்க அவரைத் தூண்டியது. தன் தேசத்தின் முந்தையப் பெருமைகளெல்லாம் தன் காலத்தில் சிறுமைப் படுத்தப்பட்டுவிடக் கூடாது என்பதும் அவை பழம் பெருமைகளாக மட்டுமே ஆகிவிடக்கூடாது என்பதுவுமே அவரை ஆட்சிக்கட்டிலை நோக்கி நகர்த்தியது.

இன்றளவும் பெருமைப்படக்கூடிய பல சாதனைகளை அவர் தன் ஆட்சியில் செய்திருக்கிறார். ஹிட்லரின் வாழ்கை நாம் படிக்க வேண்டிய ஒன்று. அதில் நல்லதும் கெட்டதுமாக பல செய்திகள் நமக்கிருக்கின்றன. அவரது அரசியல் பிரவேசத்தின் ஆரம்ப காலங்களில் சிறையிலிருந்தபோது, எழுதிய 'எனது போராட்டம்' (Mein Kamp/My Struggle) என்ற நூல் உலகப் புகழ்பெற்றது.

தன் தேசத்தின் பெருமைகளை உலகம் உணர வேண்டும் என்ற அவரது பேராசையும், அதற்குத் தடையாக இருந்தவர்கள், இருப்பவர்கள் அனைவரும் களையப்படவேண்டும் என்ற அவரின் வெறியுமே அவரது அடையாளத்தை மாற்றியமைத்தன. வாழ்க்கையின் புரிந்து கொள்ள முடியாத குரூர பக்கங்கள் சில, ஹிட்லரின் வாழ்க்கையில் எழுதப்பட்டிருக்கிறது.

ஒரு தலைவன் தன் தேசத்தை எந்த உயரத்திற்கு வேண்டுமானாலும் கொண்டு செல்ல முடியும். அதே தலைவன் தன் தேசத்தை எத்தகைய பாதாளத்திலும் தள்ளிவிட முடியும். இரண்டுக்கும் ஹிட்லர் உதாரணமாகிறார். ஜெர்மனியை உலகத்தின் உச்சிக்கு கொண்டு சென்றுவிட வேண்டுமென்ற அவரின் முயற்சியே, அதை பாதாளத்தில் தள்ளியது. அது, மிகக் குறுகிய காலத்திலேயே நடந்துவிட்ட ஒரு பெரும் சரித்திரம். முதலாம் உலகப்போருக்குப் பின்னால் ஹிட்லரின் எழுச்சியும், அவரின் வீழ்ச்சியும், அவர் துவங்கிய இரண்டாம் உலகப்போரும் இவ்வுலகம் என்றும் மறந்துவிடக்கூடாத/முடியாத வரலாறு.

தன் தலைவன் தேசத்தை வளர்ச்சிப்பாதையில் அழைத்துச்செல்லும் போது உடனிருந்து பேரானந்தப்படும் மக்கள், அவன் பாதை மாறி தேசத்தை அழிவுப் பாதையில் நகர்த்தும் போது தடுக்கவேண்டும். முடியாதபோது அவனை அரியணையிலிருந்து அகற்ற வேண்டும். அகற்றப்படுவது அவனது பதவியாக மட்டுமில்லாமல் சில சமயங்களில் அது அவனின் உயிராகவும் இருந்துவிடுவதுண்டு என்பதற்கு வரலாற்றில் பல முன் மாதிரிகள் உண்டு.

இரண்டாம் உலகப்போர் பெரும் அழிவுகளைச் சந்தித்து அதன் முடிவை நோக்கி நகர்ந்து கொண்டிருந்த காலகட்டம் அது. ஹிட்லர் அழிக்கப்படுவது அப்போது உலகத்தின் பெரும்பான்மையோரின் விருப்பமாகயிருந்தது. அவ்விருப்பம் ஜெர்மனியர்களுக்கும் இருந்ததுதான் ஆச்சரியம். ஆம், சில ஜெர்மானிய அரசாங்க, இராணுவ அதிகாரிகள் ஹிட்லர் கொல்லப்படவேண்டும் என்று விரும்பினார்கள். அதன் மூலமாக, போரை நிறுத்தி, நெருங்கி வரும் நேச நாட்டுப்படையிடமிருந்து ஜெர்மனியைக் காக்க முடியும் என்று நம்பினார்கள்.

ஹிட்லரைக் கொல்ல பல முயற்சிகள் அப்போது ஜெர்மனியில் ஜெர்மனியர்களாலயே நடத்தப்பட்டது. வெளியே தெரிய வந்தது இருபது சம்பவங்கள் மட்டும்தான். அதில் ஒன்றைத்தான் 'வால்கிரி'(Valkyrie) என்றப் படம் விவரிக்கிறது.




சூலை 20, 1944-இல் ஹிட்லரைக் கொல்ல நடந்த ஒரு உண்மைச் சம்பவம்தான் கதை. ஹிட்லர் அகற்றப்படவேண்டும், போரை நிறுத்த வேண்டும், அதே சமயத்தில் தேசம் அடிமைப்படவோ சரணடைவோக் கூடாது என்ற நிலையில் சில இராணுவ மற்றும் அரசியல்வாதிகள் சேர்ந்து ஒரு திட்டம் போடுகிறார்கள்.

நம் நாட்டில் உள்நாட்டு குழப்பம் வரும் போது பயன்படுத்தப்படும் 'அவசரகாலச்சட்டம்' (எமர்ஜன்சி) போன்று ஒரு சட்ட முறை அங்கே இருந்தது. அச்சட்டத்தைப் பயன்படுத்தி நாட்டை தங்கள் கட்டுப்பாட்டில் கொண்டு வந்துவிட முடியும் என்றும், பிறகு நேசநாட்டு படையோடு சமாதானம் பேசிக் கொள்ளலாம் என்றும் ஆலோசிக்கிறார்கள். அச்சட்டத்தின் பெயர்தான் 'வால்கிரி'.

'வால்கிரி'-ஐ நடைமுறைப் படுத்த முதலில் ஹிட்லர் கொல்லப்படவேண்டும். மேலும் அவரின் விசுவாச அதிகாரிகளும் கொல்லப்படவேண்டும். மற்றவர்களைச் சிறை பிடித்துவிடலாம் என்பது திட்டம். நாட்டின் பல பகுதிகளைத் தங்கள் கட்டுப்பாட்டில் கொண்டுவர 'சிறப்புப் படையை' பயன்படுத்த நினைக்கிறார்கள். இச்சிறப்புப் படை என்பது ஹிட்லரே உருவாக்கியது. இப்படை ஹிட்லருக்கு மட்டுமே அடிபணியும். அவர் இல்லாமல் போனால் மட்டுமே அதைப் பயன்படுத்தமுடியும் என்ற நிலையில் ஹிட்லரைக் கொல்ல ஒரு திட்டம் உருவாக்கப்படுகிறது.

'Claus von Stauffenberg' என்னும் இராணுவ அதிகாரி, ஹிட்லர் மற்றும் உயரதிகாரிகள் கூடியிருக்கும் பதுங்கு தளத்தில் வெடிகுண்டு வைப்பதற்கு பொறுப்பெடுத்துக்கொள்கிறார். இதன் மூலம் அங்கே கூடி இருப்பவர்கள் அனைவரும் கொல்லப்படுவார்கள், மேலும் அப்பதுங்கு தளத்திலிருந்து வெளிவரும் அனைத்து தகவல் தொடர்பையும் துண்டித்து விடுவதன் மூலம் இச்செய்தி வெளியே பரவுவதற்கு முன்பாக நாட்டை தங்கள் கட்டுப்பாட்டுக்குள் கொண்டுவந்துவிடலாம் என்றும் முடிவு செய்கிறார்கள்.

அதன்படி குறிப்பிட்ட நாளில் வெடிகுண்டு வைக்கப்படுகிறது. குண்டு வெடிக்கிறது. ஹிட்லர் இறந்தாரா இல்லையா, நாடு கைப்பற்றப்பட்டதா என்பவற்றைத்தான் இப்படம், மிகவும் விறுவிறுப்பாக விவரிக்கிறது.

ஹிட்லரின் வாழ்க்கையைச் சித்தரிக்கும் இன்னொரு முக்கியமான திரைப்படம் ஒன்றுண்டு. அவரது கடைசி பத்து நாட்களை விவரிக்கும் 'டவுன் ஃபால்' (Downfall) என்னும் அத்திரைப்படம், முழுக்க முழுக்க 'Wolf's Lair' என்னும் ஹிட்லரின் பதுங்குத்தளத்திலேயே நடக்கிறது. இதில் ஹிட்லரின் தோல்வி நேர குணநலன்களையும், அவரது மரணத்தையும், அவரது காதலி 'ஈவா பிரான்' மற்றும் 'கோயபல்ஸ்' போன்ற விசுவாசமிக்க அதிகாரிகளின் நிலை, அவர்கள் ஹிட்லரின் மீது கொண்ட மதிப்பு போன்றவற்றை விவரிக்கிறது. ஹிட்லரின் காரியதரிசியாக இருந்த 'Traudl Junge' என்னும் பெண்மணியின் அனுபவத்தின் அடிப்படையில் எழுதப்பட்ட 'Inside Hitler's Bunker' மற்றும் 'Inside the Third Reich' (Albert Speer) என்னும் புத்தகங்களின் திரைவடிவமது.


ஹிட்லரின் மரணம் எப்படி நிகழ்ந்தது என்பதும், இரண்டாம் உலக யுத்தம் எப்போது முடிவுக்கு வந்தது என்பதும், ஜெர்மனியும், பெர்லினும் என்ன நிலைமைக்கு ஆளாகின என்பதும் நாம் அறிந்திருக்கக்கூடிய வரலாறு.

ஒரு தலைவன் கொண்ட லட்சியங்களும் பாதைகளுமே அவனது தேசத்தை வழி நடத்துபவை. ஒரு தலைவனின் தோற்றமும், மறைவும் ஒரு தேசத்தை பாதிக்கும். அவன், நல்லவனோ கெட்டவனோ அது அவனது தேசத்தின் வளர்ச்சியோடு சம்பந்தப்படுகிறது. ஜெர்மனியின் எழுச்சியும், வீழ்ச்சியும் 'ஹிட்லரின்' வாழ்க்கையோடு சம்பந்தப்பட்டிருந்தது என்பது வரலாறு குறித்து வைத்திருக்கும் செய்தி.

ஒரு சிறந்த தலைவனை அடையாளம் காண்பதும், அவனைத் தலைமைக்குக் கொண்டுவருவதும், தன் தேசத்தின் மீது பற்றுக்கொண்ட ஒவ்வொரு குடிமகன்களின் பொறுப்பாகும். அப்படியான காலங்களில், அவர்கள் சரியாக சிந்தித்து, செயல்பட்டு காலம் தவறிவிடாமல் கடமையாற்றவேண்டும்.

Valkyrie

Downfall

Monday, March 7, 2011

சுதந்திரத்தின் தூரம் நான்காயிரம் மைல்

நீண்ட நெடிய பயணம்தான் மனிதனின் இன்றைய பரிணாம நிலைக்கான காரணம். ஒரு செல் உயிரியாக இருந்து பரிணாம வளர்ச்சியில் இத்தனை தூரம் கடந்து வந்திருக்கிறோம். மனிதத் தோன்றலுக்கு மட்டுமில்லை, மனிதன் தன் உயிரைத் தக்க வைத்துக்கொள்வதற்கும், சுதந்திரமாக வாழ்வதற்கும் கடந்து வந்த தூரங்கள் அதிகம்.

'வாழ்க்கை என்பது ஒரு பயணம்', 'இது ஒரு பயணம், அதன் பெயர் வாழ்க்கை' என்றெல்லாம் வாழ்க்கையைப்பற்றி குறிப்பிடும்போது சொல்கிறார்கள். சிலர் வாழ்க்கையில் பயணம் செய்கிறார்கள். சிலர் வாழ்க்கையைப் பயணமாகப் பார்க்கிறார்கள். இதெல்லாம் யாருக்கு சாத்தியமாகிறது என்றால், குறைந்தபட்சம் அல்லது அதிகபட்சமாக அவர்கள் உயிர்த்திருத்தலுக்கான உரிமை வழங்கப்பட்டிருப்போருக்கு. ஆனால் உயிர்த்திருத்தலுக்கே சாத்தியமில்லாத, அதற்கான வாய்ப்புகள் மறுக்கப்பட்டும், எந்த நேரத்திலும் பிணம் என்றழைக்கப்பட்டுவிடும் சாத்தியம் கொண்ட வாழ்க்கைக்கு உட்படுத்தப்பட்டோர் பலர் கொண்ட உலகம் இது.

அப்படித் தன் உரிமையை, உடமையை மட்டுமல்ல தன் உயிரையும் காப்பாற்றிக்கொள்ளப் போராடும் மக்களை நாம் அறிவோம். பல தேசங்கள் அப்படிப்பட்ட மக்களைக் கொண்டிருக்கின்றன. பல மக்கள் அப்படிப்பட்ட தேசங்களை கடந்துவர முயல்கிறார்கள்.

இந்த முயற்சி இரண்டுவிதமாக நடக்கிறது, ஒன்று அந்த மக்கள் தன்னை அடிமை கொள்ளும் தேசத்திலிருந்து வெளியேறுகிறார்கள் அல்லது தன்னை அடிமை கொள்ளாத தேசத்தை வடிவமைக்கிறார்கள். இந்தப் போராட்டம் காலம் காலமாக நடந்துகொண்டுதான் இருக்கிறது. அடிமை கொள்ளும் தேசத்திலிருந்து வெளியேறும் மக்களை 'அகதிகள்' என்று உலகம் அழைக்கிறது, தனக்கானத் தேசத்தை வடிவமைக்கும் மக்களை 'போராளிகள்' என அடையாளப் படுத்துகிறது.

இப்படித் தன் உயிருக்காகவும் சுதந்திரத்திற்காகவும் மிக நீண்ட நெடிய பயணம் கொண்ட சில மனிதர்களைப்பற்றிய கதை இது. 'பனி பொழியும் மலைகள்' 'பாலைவனம்' மற்றும் 'இமயமலை' ஆகியவற்றை அவர்கள் கடந்துவர வேண்டியதிருந்தது. அவர்கள் பயணம் செய்த தூரம் '4000 மைல்கள்'. எடுத்துக்கொண்ட காலம் 'பதினோறு மாதங்கள்'.

இரண்டாம் உலகப்போரின் போது 'போலந்து', சோவியத்தின் பிடியிலிருந்த நேரம் அது. ஜெனுஸ் (Janusz) என்கிற ஒரு போலந்துக்காரரை ஒரு சோவியத் அதிகாரி விசாரித்துக்கொண்டிருக்கிறார். அந்தப் போலந்துக்காரர் தன் மீது சுமத்தப்படும் குற்றச்சாட்டுகளை மறுக்கிறார். அப்போது அவரின் மனைவி அங்கே அழைத்து வரப்படுகிறார். அவளைப் பார்க்கும்போதே தெரிகிறது அவள் சித்தரவதைகளுக்கு உள்ளாக்கப்பட்டவள் என்பது. அதிகாரி அவளிடம் அவள் கணவனைப்பற்றி அவள் தெரிந்து கொண்டதை சொல்லச்சொல்கிறார்.

தன் கணவன் அவனது நண்பர்களோடு பேசியதிலிருந்தும், செயல்பட்டதிலிருந்தும் அவன் ஒரு உளவாளி என தான் தெரிந்து கொண்டதாக அவள் சொல்கிறாள். இதை சொல்லும்போது தன் கணவனைப் பார்க்கமுடியாமல் தலைகுனிந்து கண்ணீர் விடுகிறாள். மனைவியின் வாக்குமூலத்தின் மூலமாகவே அவனைக் குற்றவாளியாக்கி சைபீரியாவில் இருக்கும் ‘போர்க்குற்றவாளிகளுக்கான சிறையில்(POW)’ அடைக்கிறார்கள்.

சிறையில் அவனுக்கு சில நண்பர்கள் கிடைக்கிறார்கள். 'மிஸ்டர்.ஸ்மித்' என்கிற ஒரு அமெரிக்கர், 'கபரோய்' என்ற நடிகன், 'வால்கா' என்ற ருஷ்யக் குற்றவாளி (கொலை,கொள்ளைக்காக கைது செய்யப்பட்டவன்), 'தோமாஸ்' என்ற ஓவியன், (இவன் நிர்வாணப் பெண்கள் படத்தை வரைந்து அதை துணிகளுக்கும் உணவுக்கும் பண்டமாற்றாகப் பயன்படுத்துகிறான்), 'காசிக்' என்னும் போலந்துக்காரன், இவனுக்கு இரவில் கண் தெரியாது. 'வோஸ்' என்கிற லுத்துவேனிய போதகர் மற்றும் ’ஸோரன்’ என்கிற யுகோஸ்லேவிய கணக்காளன்.

நடிகன் கபரோய் சிறையில் இருந்து தப்பிப்பதைப்பற்றி ஜெனுஸிடம் சொல்கிறான். இதை ஸ்மித் மறுக்கிறார், அது நடக்கிற காரியம் அல்ல என்று. ஏனெனில் அந்தச் சிறை அமைந்திருப்பது ஒரு அடர்ந்த காட்டில், சுற்றிலும் பனிபடர்ந்த காடுகளையும், மலைகளையும் பல மைல்களுக்குக் கொண்டது அது. இதனால் தப்பிப்பதைத் தள்ளிப்போடுகிறார்கள்.

ஆனாலும் பனிப்புயல் வீசும் ஒரு நள்ளிரவில் இவர்கள் ஏழுபேரும் தப்பிக்கிறார்கள். இவர்களோடு நடிகன் வரவில்லை. பின்னால் இராணுவம் துரத்த தப்பி, காட்டுக்குள் ஓடுகிறார்கள். இவர்களின் நோக்கம் எப்படியாவது எல்லைதாண்டி 'மங்கோலியா'விற்குள் சென்றுவிடுவது. இதற்கு அவர்கள் கடக்க வேண்டியது பனியும், கொடிய மிருகங்களும் நிறைந்து கிடக்கும் அடர்ந்த ஒரு காட்டையும், ஒரு பெரிய ஏரியையும். முதல்நாள் இரவில் குளிரை விரட்ட தீ மூட்ட விறகு தேடுதலில் இரவில் கண் தெரியாத ’காசிக்’ குளிரில் விரைத்து இறந்து போகிறான். அவனைப் புதைத்துவிட்டு முன்னேறுகிறார்கள். ஜெனுஸ் சூரியனைக்கொண்டு வழிகாட்டுகிறான். வெற்றிகரமாக சைபீரிய பனிக்காடுகளிலிருந்து வெளியேறுகிறார்கள். சிறையில் உண்ணாமல் பத்திரப்படுத்தி வைத்திருந்து கையோடு கொண்டு வந்த உணவுகளைச் சிறிது சிறிதாக உண்கிறார்கள். உணவு தீர்ந்துபோய், பசியோடு பயணம் செய்கிறார்கள்.

வழியில் 'இரினா' என்ற பெண்ணை சந்திக்கிறார்கள். அவள் வார்சோ (Warsaw)விலிருந்து தப்பி வந்தவள் என்றும் அவள் பெற்றோர்களை, சோவியத் இராணுவம் கொன்றுவிட்டது என்றும் சொல்கிறாள். அவளையும் தங்களோடு சேர்த்துக்கொண்டு பயணத்தைத் தொடர்கிறார்கள். அவள் சொன்னது பொய் என்பது பின்னால் தெரியவருகிறது. அவள் மேல் பரிதாபம் வரவே அப்படி சொன்னாள் என்பதும், அவள் ஜெர்மனியர்களிடமிருந்து தப்பி ஓடிவந்த ஒரு யூதப்பெண் என்பதும் தெரியவருகிறது. பயணம் தொடர்கிறது.

அவர்கள் கடக்க வேண்டிய ஏரியை வந்தடைந்தபோது பெரும் அதிர்ச்சிக்கு உள்ளாகிறார்கள், ஏனெனில் அந்த ஏரி முழுவதும் பனியால் உறைந்து கிடக்கிறது. அதுவும் திடமான பனி அல்ல, மேலே ஏறினால் உடைந்துவிடுகிற பனி. நீந்திச்செல்லவும் முடியாது என்பதனால் ஏரியைச் சுற்றித்தான் செல்லவேண்டும் என தயங்கி நிற்கிறார்கள். அப்போது இரினா சட்டென்று பனி மீதேறி ஓடுகிறாள், அவள் ஓட ஓட பனி உடைகிறது, ஆனாலும் சமாளித்து அடுத்த கரையை அடைந்துவிடுகிறாள். இதைப்பார்த்த அனைவருக்குள்ளும் உத்வேகம் வந்து பனியின் மீது ஓடி அடுத்த கரையை அடைகிறார்கள். பின்பு அவர்களின் பயணம் பல மைல் தூரம் தொடர்கிறது. வழியில் புதைசேற்றில் மாட்டிக்கொண்ட ஒரு மான் தென்படுகிறது. அதை அடித்து உணவருந்துகிறார்கள். ஒரு வழியாக மங்கோலிய எல்லைக்கு வருகிறார்கள்.

எல்லாரும் எல்லையைக் கடக்க 'வால்கா' (ருஷ்ய குற்றவாளி) மட்டும், தான் மீண்டும் ருஷ்யாவிற்கேச் செல்லப்போவதாகச் சொல்கிறான். ஏனெனில் ருஷ்யாவே அவனது மண் என்றும் 'ஸ்டாலினே' அவனது நாயகன்(Hero) என்றும் சொல்கிறான். அவனைத் தவிர்த்து மற்றவர்கள் மங்கோலியாவிற்குள் செல்கிறார்கள். அங்கே எதிர்ப்படும் முகப்பு வளைவில் 'ஸ்டாலின்' மற்றும் 'சிவப்பு நட்சத்திர' ஓவியத்தையும் பார்க்கிறார்கள். அதனால் அங்கே செல்வது ஆபத்து என்றும், தப்பி பிழைக்க ஒரே வழி திபெத்தின் வழியாக இந்தியாவிற்கு போவதுதான் என்றும் முடிவெடுக்கிறார்கள். ஆனால் அது அவ்வளவு சுலபம் இல்லை, அவர்களின் வழியை மறித்துக்கொண்டிருப்பது 'கோபி' பாலைவனம் என்னும் உலகின் ஐந்தாவது பெரிய பாலைவனமும், உலகின் உயர்ந்த சிகரத்தைக் கொண்ட இமயமலையும்.

அவர்களுக்கு உயிர் பிழைக்க வேறு வழியில்லை, கோபி பாலைவனத்தைக் கடக்கத் துவங்குகிறார்கள். வழியில் நீர் இல்லாமலும், மணல் புயலில் சிக்கியும் பெரும் துயரத்தை அடைகிறார்கள். இதில் இலியான மரணம் அடைகிறாள். அவர்களின் பயணம் தொடர்கிறது. ஓவியன் தோமாஸும் இறக்கிறான்.

ஒருபுறம் சூரியனின் சுட்டெரிக்கும் வெப்பம், மறுபுறம் கையில் நீர் இல்லாமை என்று அவர்கள் பெரும் துயரம் கொள்கிறார்கள். வழியில் 'மிஸ்டர்.ஸ்மித்தால்' முடியாமல் போகிறது. தான் இனிமேல் பிழைக்கப்போவதில்லை, பிழைக்கவேண்டிய தேவையும் தனக்கு இல்லை என்றும், தன் மகனை ருஷ்யாவிற்கு அழைத்து வந்த குற்றவுணர்ச்சியிலிருந்து விடுபட, தான் இறப்பதுதான் சரி என்றும், மற்றவர்கள் தன்னை அங்கே விட்டு விட்டு பயணத்தைத் தொடரும்படியும் சொல்கிறார். (இவரின் மகன் ருஷ்யர்களால் கொல்லப்பட்டான்)

ஜெனுஸ் அவருக்கு ஆறுதல் சொல்கிறான். தான் பிழைத்திருக்க நினைப்பதே தன் மனைவிக்காகத்தான் என்றும், தன் மனைவியை மீண்டும் சந்திப்பதன் மூலம் அவள் என்னைக் காட்டிகொடுத்த குற்றவுணர்ச்சியிலிருந்து அவள் வெளிவருவதற்கும்தான் என்றும் சொல்கிறான். மிஸ்டர் ஸ்மித்தையும் உடன் அழைத்துச் செல்கிறான்.

பிறகு, இவர்கள் பல இன்னல்களுக்கிடையே திபெத்தை அடைகிறார்கள். அங்கே இருந்து ஸ்மித் லாசாவிற்குப் பிரிந்து செல்கிறார். ஏனெனில் அங்கே அமெரிக்க இராணுவம் அப்போது முகாமிட்டிருந்தது. அவர்கள் மூலம் அவர் அமெரிக்கா சென்றுவிட முடியும் என்பதனால். மற்ற மூவரும் இமயமலையைக் கடந்து இந்திய எல்லைக்குள் நுழைகிறார்கள். அங்கே உள்ளூர் மக்கள் அவர்களை வரவேற்கிறார்கள். அவர்கள் சிறையிலிருந்து தப்பித்தது 1941 மத்தியில், இந்தியா வந்து சேர்ந்தது 1942 மார்ச்சு மாத வாக்கில். பின்பு 1965-இல் ஜெனுஸ் போலந்து சென்று தன் மனைவியைச் சந்தித்ததாக படம் முடிவடைகிறது.

The Way Back (2010) என்னும் இந்தப்படம், The Long Walk என்னும் புத்தகத்தை அடிப்படையாகக் கொண்டு எடுக்கப்பட்டது. அண்மையில்தான் இங்கே வெளியிடப்பட்டிருக்கிறது. 1942-இல் இந்தியாவில் நுழைந்த அந்த மூன்று பேருக்கும் இந்த படம் சமர்ப்பணம் செய்யப்பட்டிருக்கிறது.

பிழைத்திருத்தல், உயிர்த்திருத்தல் என்பதற்கானப் போராட்டத்தை இந்தப்படம் சித்தரித்தாலும், சுதந்திரமாகயிருத்தல் என்பதையும் இந்த படம் சுட்டிக்காட்டுகிறது.

இரவில் கண் தெரியாத 'காசிக்' தானும் இவர்களோடு தப்பித்து வருதாகச் சொல்லும்போது ஜெனுஸ் அவனிடம் கேட்கிறான். "நீ எப்படித் தாக்குப்பிடிக்க முடியும், உன்னால் தான் இரவில் பார்க்கமுடியாதே" என்று.

அதற்கு காசிக் சொல்லும் பதில், "சரிதான், ஆயினும் அப்போது நான் சுதந்திர மனிதனாக இறப்பேன்".
.


Saturday, March 5, 2011

"அவர்கள் இல்லாமல் வாழ்க்கை சாத்தியப்படுவதில்லை"

ஐரோப்பாக் கண்டத்தின் வட மேற்கில் 'அயர்லாந்துத் தீவு' அமைந்திருக்கிறது. இது அந்த கண்டத்தின் மூன்றாவது பெரிய தீவு. எழுநூறு ஆண்டுகளாக பிரிட்டீஷ் ஆட்சியின் கீழ் இருந்தது. அதன் சுதந்திரப்போராட்டம் 1798-லிருந்தே துவங்கி விட்டாலும். அதன் கடைசிக்கட்ட போராட்டம் என்பது 1916, ஈஸ்டர் நாளில் துவங்கப்பட்ட "Easter Rising" போராட்டத்திலிருந்து துவங்குகிறது. அது 'Irish Republican Brotherhood' என்ற இயக்கத்தினால் ஆயுதப் போராட்டமாக முன்னெடுக்கப்பட்டது.

இந்தப்போராட்டத்தில் 'மைக்கேல் காலின்ஸ்' மிக முக்கிய பங்காற்றினார். அதன் தோல்விக்குப் பிறகு 1917-இல் 'Sinn Féin' என்ற கட்சி தோற்றுவிக்கப்பட்டது. 'எமோன் தேவ் வலிரா' அதன் தலைவர். காலின்ஸ் 'கெரில்லா போர்' முறையைக் கொண்டு தன் போராட்டத்தை நடத்தத் துவங்கினார். இவரின் 'கெரில்லா போர்' முறைகள் பிற்காலத்தில் பல நாட்டு போராட்டங்களில் பின்பற்றப்பட்டன. சீனாவில் 'மாவோ', இஸ்ரேலில் 'இட்சாக் ஷமிர்' (Yitzhak Shamir) போன்றவர்களால் பின்பற்றப்பட்டது. மைக்கேல் காலின்ஸ் ஒரு சிறு குழுவைக்கொண்டே தன் போராட்டத்தை நடத்தினார். விருப்பப்பட்டு வந்த இளம் ஏழைத் தொழிலாளிகளைக் கொண்டது அவரின் இராணுவம்.

இந்தப்போராட்டத்தின் முக்கிய நிகழ்வுகளில் ஒன்று 'இரத்த ஞாயிறு'(Bloody Sunday) என்று அழைக்கப்பட்ட அந்த நாள். பிரிட்டீஷ் உளவாளிகளாலேயே தங்களின் போராட்டம் சிதைக்கப்படுகிறது என கோபம் கொண்ட காலின்ஸ் அவர்களின் மீது போர்ப் பிரகடனம் செய்தார்.  12 பேர் கொண்ட தன் இளம் படையைக் கொண்டு (IRA) அவர்களைக் கொன்றார். அது ஒரு ஞாயிற்றுக்கிழமை, பதினாங்கு பிரிட்டீஷ்காரர்கள் கொல்லப்பட்டார்கள். இதற்கு பழிவாங்க பிரிட்டீஷ் இராணுவம் 'Croke Park'  நடந்த கால்பந்தாட்ட விளையாட்டின் போது துப்பாக்கிச்சூடு நடத்தியது, இதில் விளையாட்டு வீரர்கள், பொதுமக்கள் என 14 பேர் கொல்லப்பட்டார்கள். சிறையில் இருந்த மூன்று போராட்டக்கைதிகளும் கொல்லப்பட்டார்கள். முப்பத்தியொரு நபர்களைப் பலி கொண்ட அந்த ஞாயிறை, சரித்திரம் 'இரத்த ஞாயிறு' என பதிவுச்செய்து வைத்திருக்கிறது. இது நடந்தது அயர்லாந்தின் தலைநகர் 'டப்லினில்' (Dublin)1920 நவம்பர் மாதம் 21 நாள்.

Dublin-1920
போராட்டம், பேச்சுவார்த்தை உடன்படிக்கை என நாடு இரண்டாக பிரிக்கப்பட்டு உள்நாட்டு யுத்தம் நடந்தது. 'மைக்கேல் காலின்ஸ்' என்ற சிறந்த தலைவனை அந்த தேசமே கொன்றது. 'Irish Free State' என அழைக்கப்பட்ட பகுதி 1922-இலிருந்து பிரிட்டீஸ் ஆதிக்கத்திற்கு உட்பட்ட அயர்லாந்து பாராளும் மன்றம் என்ற இரட்டை ஆட்சி முறையில் இருந்தது. 1937க்குப் பிறகு அயர்லாந்து என்ற சுதந்திர நாடாக உருவாகியது.



பிரித்தானிய ஆட்சிக்கு உட்பட்ட வட அயர்லாந்தில் 'Protestant' கிருத்துவர்கள் அதிகம். கத்தோலியர்கள் சிறுபான்மையினர்கள். இரு பிரிவனர்களிடையே அரசியல் உரிமை சார்ந்து முரண்பாடுகள் இருக்கிறது. 1960-70-களில் 'Northern Ireland Civil Rights Association' என்ற இயக்கம் சிறுபான்மையினர்களான 'கத்தோலிக்க கிருத்துவர்களின்' உரிமைக்காகப் போராடி வந்தது. இந்த இயக்கம் 1972 சனவரி 30இல் ஒரு 'பொது எதிர்ப்பு ஊர்வலத்தை' ஏற்பாடு செய்தது. இதில் பல்லாயிரக்கனக்கான மக்கள் கலந்து கொண்டார்கள். இந்த ஊர்வலத்தைத் தடுக்க இராணுவம் தயார் நிலையில் நிறுத்தப்பட்டது. இதில் கலவரம் வெடிக்கும், அதை தடுக்க இந்த ஏற்பாடு என சொல்லப்பட்டது.


நேரம் ஆக ஆக மக்களின் எண்ணிக்கை அதிகரித்தது. கூட்டம் மெதுவாக குறிப்பிட்டப் பாதையில் முன்னேறியது. இராணுவம் தனக்குத்தேவையான சிறு சலசலப்புக்காகக் காத்திருந்தது. எதிர்பார்த்தபடி இளவட்டங்களின் கூச்சல், ஆர்பாட்டம் அதிரிகரித்தது. இதுதான் காரணம் என்று இராணுவம் செயலில் இறங்கியது. ஆர்பாட்டக்காரர்கள், ஆயுதங்கள் வைத்திருந்தார்கள், அது தங்களை நோக்கிப் பிரயோகிக்கப்பட்டது என்று காரணம் காட்டி 'இருபத்தியாறு ஊர்வலக்காரர்களை' இராணுவம் சுட்டுக்கொன்றது. இந்த 'படுகொலைகள்' நடந்ததும் ஒரு ஞாயிற்றுக்கிழமைதான். சரித்திரம் இந்த நாளையும் 'இரத்த ஞாயிறு' என்றுதான் குறித்து வைத்திருக்கிறது.


1972-ல் நடந்த இரண்டாவது 'இரத்த ஞாயிறு' நாளில் நடந்த சம்பவங்களை 'இரத்த ஞாயிறு' (Bloody Sunday) என்ற இந்தப் படம் நம் கண்முன்னே கொண்டுவருகிறது. இந்தப் படம் சம்பவம் நடந்த இடத்திலேயே படமாக்கப்பட்டது. ஏறக்குறைய எல்லா சம்பவங்களும் உண்மையில் நடந்ததைப்போலவே மறுஉருவாக்கம் செய்யப்பட்டு படமாக்கப்பட்டது. ஒரு பரபரப்பான கலவரத்துக்குள் மாட்டிக்கொண்ட உணர்வை இந்தப்படம் நமக்குத் தருகிறது.

'மைக்கேல் காலின்ஸின்' வாழ்க்கையை 'மைக்கேல் காலின்ஸ்' என்னும் படம் விவரிக்கிறது. வழி நடத்தும் தலைவன், அவன் முடிவுகளில் இருக்கும் உறுதி, தெளிவு, பிடிவாதம் என ஒரு தேர்ந்தத் தலைவனின் எல்லா குணாம்சங்களையும் இந்தப்படத்தின் மூலம் நாம் காணமுடிகிறது. 1920இல் நடந்த 'இரத்த ஞாயிறு' சம்பவங்கள் இந்த படத்தில் பதிவு செய்யப்பட்டிருக்கிறது.


ஆயுதப்போராட்டமோ அல்லது அரசியல் போராட்டமோ இரண்டையும், ஆளும் வர்க்கம் தடுக்கும் நசுக்கும் என்பதை இந்த இரண்டு 'அயர்லாந்து அரசியல்' படங்கள் நமக்குச் சொல்கின்றன.

'மைக்கேல் காலின்ஸ்' திரைப்படத்தில் 'மைக்கேல் காலின்ஸ்'-இன் மறைவுக்குப் பின்னர் அவரைப்பற்றி அவரின் நண்பர் 'ஜோ' குறிப்பிடும்போது இப்படிக் குறிப்பிடுகிறார், "சில மனிதர்கள் காலவோட்டத்தில் தேவைப்படுகிறார்கள், அவர்கள் இல்லாமல் வாழ்க்கை சாத்தியப்படுவதில்லை"


இப்படி காலவோட்டச் சக்கரத்தில் 'தனக்கானயிடத்தில்' சரியாகப் பொருந்தி, வாழ்க்கையை நகர்த்தி வைத்துவிட்டுப்போன பல மனிதர்கள், தலைவர்கள் உண்டு. அவர்கள் இல்லாமல் அந்தச் சக்கரம் நகர்ந்திருக்குமா என்பது சந்தேகம்தான்.

சில சமயம் வாழ்க்கை அப்படிப்பட்ட மனிதர்களைத் தேடிப்பிடிக்கிறது. சூழல் அதைத் தீர்மானிக்கிறது. சில சமயங்களில் மனிதர்கள், மாமனிதர்கள் அப்படிப்பட்ட சூழலை உருவாக்குகிறார்கள். அவர்கள் வாழ்க்கையைத் தேடிப்பிடிக்கிறார்கள். அது அவர்களுக்கானது மட்டுமல்ல. தன்னோடும் தனக்குப் பின்னால் வருபவர்களுக்குமானது அது.



Tuesday, March 1, 2011

Canon 5D/7D HD Movie Post-Production: அறிமுகம்

Canon 5D/7D HD movies பற்றி நாம் தெரிந்துக்கொள்ள வேண்டிய சில முக்கிய விபரங்கள்:

1. 'Quicktime movies' ஆக சேமிக்கப்படுகிறது. அதாவது .mov கோப்பாக (.mov format).


2. 'H.264' codec-இல் என்கோடு (encode) செய்யப்படுகிறது.


3. இந்த 'movie'-ஐ 'Quicktime Player'ஐ பயன்படுத்திப் பார்க்கலாம்.


4. 'FCP' அல்லது 'AVID' இல் அப்படியே நேரடியாக எடிட் செய்யமுடியாது. ஏனெனில் இந்த 'H.264' கோடக் என்பது 'Compressed' கோப்பு (file).


5.'FCP'இல் எடிட் செய்ய 'Apple ProRes' கோடக்காக மாற்றவேண்டும். (Uncompressed file)


6.'AVID'இல் எடிட் செய்ய 'DNxHD' கோடக்காக மாற்றவேண்டும்.


7. இந்த HD Movie-களில் 'Time Code' கிடையாது. ஆனால் இப்போது 'Canon FCP plug- in' கிடைக்கிறது. இதைப்பயன்படுத்தி 'டைம் கோட்' உருவாக்கிப் பயன்படுத்தமுடியும். ஆனால் இதில் மிகக் கவனமாக இருக்க வேண்டும். தவறானால் மொத்த 'HD Movie'யும் பயனற்றுப் போய்விடும்.


Canon 7D பற்றி சில தகவல்கள்: 

இதில் HD movies '1080p' அல்லது '720p' இல் உருவாக்கப்படுகிறது. அதாவது '1080','720' என்பது '1920X1080','1280x720' பிக்சல் ரேஷியாவையும் 'p' என்பது 'progressive' விடியோ என்பதையும் குறிக்கிறது.


('progressive' or 'Interlace' என்றால் என்ன என்று தெரிந்துக்கொள்ள 'அடுத்த தலைமுறை 'HD' தொழில்நுட்பம்' என்னும் கட்டுரையைப் பார்க்கவும்)


நொடிக்கு 24,25,30,50 மற்றும் 60 ஃபிரேம்களாக (frames) படம் பிடிக்கமுடியும்.


இதில்..

24fps என்பது திரைப்படம் ஓடும் ஃபிரேம்களின் எண்ணிக்கை.
25fps என்பது 'PAL' விடியோ முறையில் இருக்கும் ஃபிரேம்களின் எண்ணிக்கை.
30fps என்பது 'NTSC' விடியோ முறையில் இருக்கும் ஃபிரேம்களின் எண்ணிக்கை.

('PAL' மற்றும் 'NTSC' பற்றி அறிய இந்த கட்டுரையைப் பார்க்கவும்)


50fps மற்றும் 60fps என்பது அதிக ஃபிரேம் எண்ணிக்கையில் படம்பிடிப்பது. இதன் மூலம் 'Slow Motion' படம் கிடைக்கும். அதாவது இந்த 50fps மற்றும் 60fps மூவிகளை 24fps கோப்புகளாக மாற்றிப் பயன்படுத்த வேண்டும். இதை கேமராவிலேயே செய்ய முடியாது. அதை கணினியில் தான் செய்ய வேண்டும். அது எப்படி என்று தெரிந்துக்கொள்ள இந்தத் தளங்களுக்குச் செல்லவும்.


http://www.suite101.com/content/creating-proper-slow-motion-with-the-canon-7ds-60-fps-function-a306106


http://philipbloom.net/tutorials-1/how-to-turn-50p-and-60p-into-slow-motion-with-cinema-tools/



24,25,30,50 மற்றும் 60 ஃபிரேம்கள் என்பது ஒரு சௌகரித்திற்காக சொல்லப்படுவது. உண்மையில் அவை..

24 என்பது 23.976 fps
25 என்பது 25 fps
30 என்பது 29.97 fps
50 என்பது 50 fps
60 என்பது 59.94 fps


இந்த மூவிகளை சேமிக்க 'மெமரி கார்டில்' எவ்வளவு இடம் தேவை?


1920x1080 - 24, 25 or 30fps இல் சேமித்தால்..
4GB கார்டில் 12 நிமிடம்.
16GB கார்டில் 49 நிமிடம்.
அதாவது நிமிடத்திற்கு 330 MBytes/min, ஒரு மணிநேரத்திற்கு 19.33 GBytes/hr
1 TB 'ஹார்ட்டிஸ்கில்' 50 மணிநேர படம் சேமிக்கலாம்.


1280x720 - 50fps அல்லது 60fps இல் சேமித்தால்..
4GB கார்டில் 12 நிமிடம்.
16GB கார்டில் 49 நிமிடம்.
அதாவது நிமிடத்திற்கு 330 MBytes/min, ஒரு மணிநேரத்திற்கு 19.33 GBytes/hr
1 TB 'ஹார்ட்டிஸ்கில்' 50 மணிநேர படம் சேமிக்கலாம்.


640x480 - 50fps அல்லது 60fps இல் சேமித்தால்..(தொலைக்காட்சிக்கு போதுமான ஃபிக்சல் ரேஷியோ)
4GB கார்டில் 24 நிமிடம்.
16GB கார்டில் 99 நிமிடம்.
அதாவது நிமிடத்திற்கு 165 MBytes/min, ஒரு மணிநேரத்திற்கு 9.9 GBytes/hr
1 TB 'ஹார்ட்டிஸ்கில்' 95 மணிநேர படம் சேமிக்கலாம்.




இந்த விடியோக்களை படத்தொகுப்பு (எடிட்) செய்வதற்கு முன்னால் கவனிக்க வேண்டியவைகள்:


FCP-இல் படத்தொகுப்பு செய்ய 'H.264' விடியோக்களை 'Apple ProRes' விடியோக்களாக மாற்ற வேண்டும்.


'Apple ProRes' கோடக் ஐந்து வகையில் இருக்கிறது. அதில் மூன்று முக்கியம் வாய்ந்தவைகள். அவை ProRes, ProResHQ மற்றும் ProRes 4444.


Canon HD விடியோக்களை 'Apple ProRes' கோப்புகளாக மாற்றும்போது, அவை எடுத்துக்கொள்ளும் சேமிப்பு இடம்..


-ProRes - 1080p24 takes up 53 GB/hr or 18 hrs per 1 TB drive.
-ProResHQ - 1080p24 takes up 79 GB/hr or 12 hrs per 1 TB drive.
-ProRes4444 - 1080p24 takes up 119 GB/hr or 8 hrs per 1 TB drive.


Avid-இல் படதொகுப்பு செய்ய 'DNxHD' கோடாக் விடியோவாக மாற்றவேண்டும்.


Canon HD விடியோக்களை 'DNxHD' கோப்புகளாக மாற்றும்போது, அவை எடுத்துக்கொள்ளும் சேமிப்பு இடம்..


-DNxHD 175x - 1080p24 takes up 49 GB/hr or 19 hrs per 1 TB drive.
-DNxHD 115 - 1080p24 takes up 74 GB/hr or 13 hrs per 1 TB drive.


இப்படி விடியோ கோடக்குகளை மாற்றுவதின் மூலம் விடியோ தரத்தில் மாற்றம் வராது. ஆனால் படத்தொகுப்பு செய்வதற்கு சுலபமாக இருக்கும். வண்ண ஒழுங்கமைத்தலிலும் (Color Correction) நிறைய சாத்தியங்களைக் கொடுக்கும்.




'DI'க்கு கொண்டுச்செல்லும் போது 'Image Sequences (PNG,JPG..etc)'ஆக கொடுக்கலாம். நான் அப்படிதான் செய்தேன்.


நினைவில் கொள்ள வேண்டியது ஒன்று. 5D/7D விடியோக்களில் 'டைம் கோட்' கிடையாது. அதனால் இப்படி கோடாக்குகளை மாற்றி படத்தொகுப்பு செய்யப்படும் விடியோக்களை நாம் அப்படியே 'Online' (முழு தரம்) விடியோக்களாக பயன்படுத்தலாம். 'Offline' 'Online' தேவையில்லை.


'Offline' 'Online' என்பது ஒரு தொழில்நுட்பமுறை. அதாவது ஒரு விடியோவை அப்படியே முழு தரத்தில் படத்தொகுப்பு கணினியில் சேமித்து படதொகுப்பு செய்யும் போது அந்த விடியோவின் 'file size' அதிகமாக இருப்பதினால் கணினியின் இயங்கும் தரம் அதிகமாக தேவைப்படும், கணினியின் செயல்திறன் மெதுவாகும், அதனால் படத்தொகுப்பு வேலையின் வேகம் குறையும்.


இதை தவிர்ப்பதற்கு விடியோக்களை குறைந்த தரத்தில் கணினியில் சேமித்து படத்தொகுப்பு முடிந்தபிறகு, படத்தில் பயன்படுத்தப்பட்ட, தேவையான 'shots'-களை மட்டும் 'Time code'ஐப் பயன்படுத்தி முழுத்தரத்தில் மீண்டும் கணினியில் ஏற்றி அதை இறுதி விடியோவாக பயன்படுத்துவார்கள். இந்த விடியோக்களையே வண்ண ஒழுங்கமைத்தலுக்கு பயன்படுத்தவேண்டும்.


தரம் குறைந்த விடியோவை (offline) என்றும் முழுத்தரம் கொண்ட விடியோவை (online) என்றும் அடையாளம் கொள்கிறோம். 


இப்படி செய்வதின் மூலம் தேவையற்ற நேர விரையத்தைத் தவிர்க்க முடியும்.