‘1-4 கோடி பணத்தை வைத்துக்கொண்டு, திரைப்படம் எடுக்க வராதீர்கள்’ என்பதுதான் இப்போதைக்கு பேசும் பொருளாகியிருக்கிறது. உண்மையில் 4 கோடி என்பது பெரும் பணம் அல்லவா…!? எனில் அப்பணம் ஒரு திரைப்படம் எடுக்க போதுமானது இல்லை என்பதோ அல்லது 4 கோடிக்குள் எடுக்கப்பட்ட திரைப்படங்களை வெளியிடுவதில் சிக்கல் இருக்கிறது என்பதோதான் இப்போதைய பிரச்சனை.
எனில், ஒரு திரைப்படம் எடுக்க எவ்வளவு பணம்தான் வேண்டும்? அல்லது அப்பணம் எங்கெல்லாம் செலவாகிறது? இதை புரிந்துக்கொள்வது அவசியம் தானே..!
ஒரு திரைப்படத்தயாரிப்பில் பல்வேறு செலவினங்கள் இருக்கின்றன. ஒரு கதையை படமாக எடுக்கலாம் என்று தயாரிப்பு நிறுவனமோ அல்லது நடிகரோ முடிவெடுத்துவிட்டால், அங்கே இருந்து செலவினங்கள் துவங்குகிறது.
- இயக்குநருக்கு ஒரு ‘Advance’ கொடுத்து உறுதிப்படுத்துகிறார்கள். அது எவ்வளவு வேண்டுமானாலும் இருக்கலாம். (பெரும்பாலும் ஆயிரத்திலோ… லட்சத்திலோ இருக்கலாம். பெரிய இயக்குநர்களையும், பெரிய பட்ஜெட் படங்களுக்கு அது அதிகமாக இருக்கலாம்)
- பெரிய நடிகர் என்றால், அவருக்கு ஒரு தொகை கொடுத்து(Advance) உறுதி செய்கிறார்கள். (லட்சம் முதல் கோடிகளில்)
- இயக்குநரும், அவருடைய குழுவும் அமர்ந்து கதை, திரைக்கதை, வசனம், நடிகர்கள், படபிடிப்புத்தளங்கள், உடைகள், அரங்க வடிவமைப்பு, தொழில்நுட்ப குழு போன்றவற்றை முடிவு செய்ய… முற்தயாரிப்பு பணி (Pre Production) செய்வதற்காக அலுவலகம் ஏற்பாடு செய்யப்படுகிறது. குறைந்தது மூன்று மாதங்களில் துவங்கி சில மாதங்கள் அதற்கு ஆகும். அந்த அலுவலகத்திற்கான வாடகை, உணவு, மின்சாரம், பயணப்படி, சம்பளம் என்று (சில லட்சங்கள்) செலவாகும்.
- மேனேஜர்ஸ், அவருடைய உதவியாளர்கள் சம்பளம். (சில, பல ஆயிரங்களில் இருக்கலாம்)
- இசையமைப்பாளருக்கு ஒப்பந்தம் போட்டு, படபிடிப்பிற்கு முன்பாக தேவைப்படும் பாடல்களை பதிவு செய்து வாங்குகிறார்கள். இசையமைப்பாளருக்கான சம்பளம், பிற இசைக் கலைஞர்களுக்கான சம்பளம் (சில, பல லட்சங்கள் )
- பாடலாசிரியர், பாடகர்களுக்கான சம்பளம். (சில லட்சங்கள்)
- ஒளிப்பதிவாளரை ஒப்பந்தம் செய்வது, அவருடைய உதவியாளர்களின் சம்பளம், படபிடிப்பிற்கு(Camera Department Materials) தேவையான பொருட்களை வாங்குவதற்கு என்று பணம் தேவைப்படுகிறது. (சில ஆயிரங்களில் துவங்கி லட்சங்களில் இருக்கும்)
- கதைக்கு ஏற்ற முக்கிய, துணை நடிகர்களை முன்பணம் கொடுத்து ஒப்பந்தம் போடுதல். (சில ஆயிரங்களிலிருந்து லட்சங்களில் தேவைப்படலாம்)
- கேமரா, லென்ஸ், விளக்குகள், கிரேன், ட்ராலி போன்ற தொழில்நுட்பக் கருவிகளுக்கான வாடகை, ஒரு நாளைக்கு இவ்வளவு என்று பேசி, மொத்த படபிடிப்பு நாட்களைப் பொறுத்து ‘முன்பணம்’ கொடுத்து கேமரா நிறுவனங்களுக்கு (Camera Unit) ‘அக்ரிமெண்ட்’ போடுவார்கள். (ஒருநாளைக்கு 30k-வில் துவங்கி லட்சத்தில் இருக்கலாம். படத்தின் தேவையைப்பொறுத்து, விளக்குகளின் எண்ணிக்கை, கேமராவின் தரம், லென்ஸின் தேவை, பிற உபகருவிகளின் பயன்பாடு பொறுத்து இது வேறுபடும்)
- கதைக்கு ஏற்ற அரங்கங்கள் அமைத்தல், அதற்கு தேவையான பொருட்களை ஏற்பாடு செய்தல், கலை இயக்குநர், அவருடைய உதவியாளர்களுக்கான சம்பளம் போன்றவற்றிற்கு பணம் செலவாகும். (சில, பல லட்சங்களில் இருக்கலாம்)
- ஒவ்வொரு திரைப்படத்திற்கு, அதில் நடிக்கும் முக்கிய கதாப்பாத்திரங்களுக்கான உடைகளை தயாரிப்பு நிறுவனம் தான் செலவு செய்து ஏற்பாடு செய்கிறது. காரணம், பல்வேறு நாட்களில் நடக்கும் படபிடிப்பில், காட்சிகளுக்கு ஏற்ற உடைகளை பத்திரப்படுத்தி வைக்க வேண்டும் அல்லவா, அதற்காகதான் தயாரிப்பு நிறுவனம் அதனை ஏற்பாடு செய்கிறது. உடையளங்கார நிபுணர் (Costumer), அவருடைய உதவியாளர்கள் சம்பளம், நடிகர்களுக்கான உடைகள் வாங்குவதற்கும், தைப்பதற்கும் பணம் செலவாகிறது (சில, பல லட்சங்களில் அது இருக்கும்)
- படபிடிப்பிற்கு ஏற்ற இடங்களை தேர்வு செய்தல், பார்வையிடுதல், இடங்களுக்கான வாடகை, அனுமதிக்கான கட்டணம் என பணம் செலவாகிறது. (ஆயிரங்களில் துவங்கி லட்சங்களில் இருக்கலாம்)
- படத்தொகுப்பாளர், நடன இயக்குநர், சண்டை பயிற்சியாளர், புகைப்படக்காரர், ஒப்பனைக் கலைஞர் என்று பிற தொழில்நுட்பாளர்களையும் முன்பணம் கொடுத்து ஒப்பந்தம் செய்யப்படுகிறது. (சில ஆயிரங்கள் முதல் லட்சங்கள் ஆகலாம்)
- கதை, திரைக்கதை, வசனம், நடிகர்கள், பாடல்கள், உடைகள், படபிடிப்புத்தளங்கள், அரங்குகள், கருவிகள், தொழில்நுட்பக் கலைஞர்கள் போன்றவற்றை முடிவு செய்தப் பிறகே படபிடிப்பிற்கு கிளம்புகிறார்கள்.
படபிடிப்பில் பல்வேறு செலவினங்கள் இருக்கிறது அதனைப்பற்றி அடுத்த பதிவில் பார்ப்போம்.
(தொடரும்)
#Cinema #tamilcinema #movies #MovieMaking #filmmaking #expenses #filmexperience #vijayarmstrong
கருத்துகள்
கருத்துரையிடுக